Ni Philip A. Cerojano
Wednesday, May 18, 2011
NAGTUO ang pipila ka mga kawani sa Cebu City Hall nga nadestino sa Inayawan sanitary landfill nga di aksidente ang nahitabo sa usa ka basurero nga nakaon sa shredder sa basura nga malata niadtong Martes sa buntag.
Alang kanila di binuhatan og tawo, kon di sa di makita nga linalang, ang nahitabo sa pag-andar sa makina nga bio shredder, nga naa sa sanitary landfill.
Kini ang pagtuo sa electrician sa Suki Company nga maoy giabangan sa Cebu City Government sa mga ekipo nga gigamit sa pagproseso sa basura human sa closure order niadtong Abril1 ning tuiga.
Matod pa ni Engr. Randy Navarro, landfill manager, nga giisplikaran siya sa electrician nga di moandar ang bio shredder kon way operator nga mopaandar niini sanglit mosubay kini og taas nga pamaagi una pa mapaandar og balik ang makina.
Giklaro ni Navarro nga human mo trip off ang bio-shredder gipawong kini ug gilimpyohan ang blade ni Joselito Nuñez, kinsa nahiagom og mga bali sa iyang kabukugan diha sa iyang wa nga bukton, tuo nga bitiis ug upat ka pulgadang samad sa tuong paa.
Wa maputol ang iyang bukton sukwahi sa unang report.
Ang wang bukton ni Nuñez butangan og stainless sa gawas nga bahin ug gisemento ang bitiis.
Si Navarro nipasabot nga gikinahanglan pang ukbon ang magnetic switch sa bio shredder ug tuslokon ang reset button sa di pa ang pagtuslok sa switch on button.
Ang electrician nipakita pa kang Navarro sa mga buhaton sa di pa moandar og balik ang shredder.
Mao nga nahibong sila kon nganong niandar ang makina bisan kon wa moagi sa maong proseso.
Siya nagtuo nga kini binuhatan kini sa di ingon kanato.
Matod ni Navarro nga ang iyang mga kauban sa landfill aduna say kahibudngan sa lugar hilabi na panahon sa kagabhion.
Gitug-an niya nga sa landfill aduna na silay daghang nakaplagan nga fetus ug gipalibutan usab kini sa mga dagkong kahoy sama sa lumboy, mangga ug uban pa.
Gumikan sa maong hitabo, gisuspenso kagahapon ang paggaling sa mga basura sa malata ug di malata hangtod mahuman og check-up sa electrician sa Suki Company ang shredder machine.
Si Mayor Michael Rama una nang nipadayag nga abagahon sa dakbayan sa Sugbo ang tanang mga galastuhan sa pagkadisgrasya ni Nuñez.
Gipatik sa mantalaang SuperBalita Cebu Mayo 19, 2011. Linkback:
https://tubagbohol.mikeligalig.com/index.php?topic=40894.0
