MikeLigalig.com

KORONADAL CITY -- Moabot ngadto sa 17 ka tawo ang gidala sa balay tambalanan human nahilo sa gikaon nga pansit sa alas 12:40 sa udto niadtong Dominggo didto sa probinsiya sa South Cotabato.

Matud ni T'boli Mayor Dibu Tuan nga gikan sa rally ang mga biktima sa Surallah aron pugngan ang paglupad sa eroplano sa Sumifru nga magpahigayon unta og aerial spraying.

Pagkahuman sa lihok protesta, nangaon og pansit ang mga nag-rally.

Sa diha nga nakauli na ang mga biktima sa ilang bay, diin pag-abot sa kagabhion, nakasinati na sila og sobrang pagsakit sa ilang tiyan, nagsuka-suka ug nagkalibanga.

Gipangdala dayon sila sa More House Clinic sa Barangay Edwards, T'boli kon diin uban kanila gibalhin sa South Cotabato Provincial Hospital.

Nabalaka si Mayor Tuan nga posibleng motaas pa ang ihap sa mga nadala sa hospital gumikan daghan kanila ang nakakaon sa pansit.

Nagkuha na og salin sa pansit ang South Cotabato Integrated Provincial Health Office aron ipailawom sa laboratory test. (Edgar E. Fuerzas)


Gipatik sa mantalaang SuperBalita Davao Agosto 04, 2015.