Ni Stephanie Viovicente-Berganio
Tuesday, March 15, 2011
NAKABSAN sa kinabuhi usa ka lalaki human nabangga ang gimanehong motorsiklo niadtong Domingo mga alas 5:30 sa hapon didto sa Camp-1, Maramag, Bukidnon.
Giila ang biktima nga mao si Melquisedeth Yandug, 55, minyo, taga Purok-13, Barangay Poblacion, siyudad sa Valencia.
Nasayran nga nagmaneho ang biktima sa iyang motorsiklo ug pauli na niadtong tungora dihang pagliko sa dalan natabo ang usa ka motorela nga miresulta sa pagsungag.
Sa kakusog sa pagkabangga ug kakusog sa pagpadagan sa biktima nilagpot kini ug nabunal ngadto sa motorela. Nibanda pa ang biktima una nabunal pag-usab sa semento.
Gidala pagdali sa duol nga balay tambalanan sa dapit apan tungod sa
grabeng naangkon niini dali kining giduso sa Northern Mindanao Medical Center (NMMC) ning siyudad sa Cagayan de Oro.
Pipila usab ka oras ang pakigbugno niini sulod sa emergency room apan mga alas 12:25 kagahapon sa kadlawon nakabsan sa kinabuhi ang biktima.
Ang pamilya niini dili makadawat sa nahitabo hinungdan nga ilang pasakaan og kaso ang motorela driver kinsa giingong nitipas sa dalan mao nga nasapon sa motorsiklo.
Ang patayng lawas sa biktima nga anaa sa morgue sa NMMC sa pagsulat ning balita gikatakdang ibalik sa puloy-anan niini sa Bukidnon.
Gipatik sa mantalaang SuperBalita Cagayan de Oro Marso 15, 2011.
Linkback:
https://tubagbohol.mikeligalig.com/index.php?topic=39042.0
