Ni Rissa Legaspi /EIM (Banat) | Updated May 12, 2015 - 12:00am
CEBU, Philippines- Patay ang usa ka lalaki human gikatahong gitukmod sa usa ka lalaking gituohang adunay kakulian sa pangisip nga kalit misulod sa panimalay diin nakig-inom ang biktima ug duha ka amigo diha sa Sitio Sangi, Calajoan, Minglanilla.
Apan ang mga pag-umangkon sa namatay nga si Lamberto Gimenez, 55, nga sila si Venus Gimenez ug Jezrael Gimenez mihangyo sa kapolisan sa paghimo og lawom nga imbestigasyon bahin sa kamatayon sa biktima.
Ang grupo nila ni SPO1 Renato Masangcay daling mihimo og imbestigasyon sa nahitabo ug ilang nasayran gikan sa mga kainom sa biktima nga sila si Gilbert Paraiso Badayos caretaker sa balay diin nahitabo ang insidente ug si Cidro Biscucho giingong usa ka wala mailhing tawo nga gituohan nilang may kakulian sa pangisip ang mihimo sa krimen.
Sumala pa sa nakuhang impormasyon sa kapolisan, samtang sila nag-inom kalit misud ang wala mailhing lalaki ug misaka sa ikaduhang andana hinungdan nga ilaha kining gigukod.
Apan pag-abot sa ibabaw, gikatahong kalit gitukmod sa maong tawo si Gimenez ug natagak kini gikan sa ika-12 nga ang-ang sa hagdan ngadto sa ubos.
Daling gidala sa Minglanilla District Hospital ug gibalhin sa Vicente Sotto Memorial Medical Center apan gikatahong nakabsan kini sa kinabuhi. Ang kapolisan mihimo pa og imbestigasyon bahin sa nahitabo sanglit wala madakpi ang tawong giingong maoy mitukmod sa biktima. (BANAT NEWS)
Linkback:
https://tubagbohol.mikeligalig.com/index.php?topic=79949.0