Ni STEPHANIE V. BERGANIO
GIINGONG upat ka mga wala maila nga lalaki ang mitabang og luba sa usa ka lalaki niadtong Domingo sa kaadlawon sa Barangay Balulang, siyudad sa Cagayan de Oro.
Giila ang biktima nga mao is Emmanuel Beren, 34, minyo, taga Balongis, Cagayan de Oro.
Sa inisyal nga imbestigasyon sa Police Station 4 sa Carmen pangulohan ni Police Senior Inspector Jopet Paglinawan, nasuta nga ang biktima nakig-inom sa balay sa higala niini niadtong tungora dihang kalit nga miabot ang upat ka mga lalaki nga gitouhang mga Muslim ug gitabangan og luba ang biktima.
Nakaangkon ang biktima og nagkadaiyang samad dinunggaban sa lawas, hinungdan sa iyang hinanaling kamatayon.
Ang mga suspetsado yano lang dayon kaayong nanglakaw nga gihulagway pa sa mga nakasaksi nga gawas sa armado og kutsilyo ug kahoy, aduna pay bitbit nga kalibre 45.
Gibutyag ni Paglinawan nga usa sa anggulong ilang giimbestigahan ning panahona ang kalambigitan sa ginadili nga druga.
Ang asawa sa biktima nga mao si Emily nakurat pag-ayo sa nahitabo sa iyang bana tungod kay nananghid man kini niadtong tungora nga adunay lakwon, hinungdan nga mitugot siya hilabi na anaa raman sa palibot.
Gibutyag usab niini nga wala kini mga kaaway sa dapit ug gani wala gyod gikalambigitan niini nga problema sa dapit.
Ang kaso padayon pa nga giimbestigahan sa kapolisan ning panahona hilabi na usab ang pag-ila sa upat ka wala mailang suspetsado.
Gipatik sa mantalaang SuperBalita Cagayan de Oro Agosto 31, 2015.
Linkback:
https://tubagbohol.mikeligalig.com/index.php?topic=80850.0
