Saturday, March 19, 2011
SOUTHERN Philippines Medical Center (SPMC) ang gitugpahan sa usa ka lalaki human siya gibanhigan sa wa mailhing tawo didto sa Arakan Valley, North Cotabato niadtong Biyernes.
Gibanhigan alas 9 sa gabii mao si Felix Alinsunurin, 27, nagpuyo sa Katipunan, Arakan Valley, base sa blotter sa mga guwardiya sa SPMC.
Inisyal nga impormasyon nga nakuha sa mga gwardiya sa tambalanan, nasayran nga ang biktima nagmaneho sa iyang motorsiklo pauli sa ilang bay apan gibanhigan siya dihang miabot sa Quarry, Arakan Valley.
Si Alinsunurin nakaangkon og unom ka mga samad pinusilan sa iyang kalawasan human siya girapido sa mga tawo nga nagtinguha sa iyang kinabuhi.
Ang biktima daling gidala dinhi sa siyudad sa Davao aron patambalan sa SPMC.
Mga gwardiya sa tambalanan nagbutyag sa Superbalita nga nahibulong sila sanglit daw napaso lang ang bahin sa lawas sa biktima nga naigo sa bala.
Nagduda ang mga gwardiya nga basin dunay anting-anting ang biktima mao nga wa siya nagrabehan sa pagpamanhig kaniya.
Giingon nga nagsusi na ang kapulisan sa ilang lugar aron sayron kung unsa ang motibo, kinsa ang mga suspek nga gitinguha nga sikopon aron patubagon sa salaod nga ilang nahimo. (Alger Dura)
Gipatik sa mantalaang SuperBalita Davao Marso 20, 2011.
Linkback:
https://tubagbohol.mikeligalig.com/index.php?topic=39247.0
