Friday, August 5, 2011
NAKABSAN sa kinabuhi ang usa ka lalaki human giposposan og kawayan niadtong nilabayng mga adlaw, apan nadiskubre ang patayng lawas niadtong Huwebes sa buntag sa Sitio Cawayan, Barangay Poblacion, lungsod sa Claveria, Misamis Oriental.
Nanimaho ug anaa na sa pagkadugta ang patayng lawas ni Tereso Maghanoy, hingkod ang edad, sa susamang dapit. Ang kabaho sa lawas niini naghatag og perwisyo sa mga residente sa dapit hinungdan nga napugos sila sa pagpangita niini.
Gisaysay ni Kapitan Moises Macabasa sa Barangay Poblacion nga boluntaryong mitahan ngadto kaniya ang suspetsado sa krimen nga mao si Julito Alyas Jojo Dalaynon, hingkod ang edad sa susamang dapit.
Ang suspetsado nisaysay sa hitabo nga igo lamang sila nag-inom niadtong tungora dihang kalit lang nga nagbikil og sulti.
Nasuko kaniya ang biktima ug kalit lang nanghagit og away ug aksiyon nga lubaon ang suspek. Nagyawyaw pa kini sa dili maayo nga pulong hinungdan nga dihang nakakita og kawayan gikuha sa suspek dayon deretsong giposposan ang ulo niini makapila ka higayon hinungdan sa pagkaluno niini.
Dihang nawad-an na sa panimout ang biktima, giguyod kini sa suspek paingon sa kasagbutan ug miabot pa pipila ka adlaw usa nanimaho ug nadiskubre sa residente sa dapit.
Ang suspek nga si Jojo nagdesisyon nga motahan na lamang tungod kay pipila usab ka gabii nga dili siya makatulog sa iyang nahimo labina kini ang unang hitabo nga nakahimo og krimen.
Si Kapitan Macabasa maoy ni turnover sa suspek ngadto kang Police Inspector Allan Curato, kinsa hepe sa Claveria Police Station.
Gipanawagan usab sa kapitan ang mga paryente ni Maghanoy nga magbisita niini aron mapsakaan og kaso tungod kay nasayran wala paryente sa dapit ang biktima ug anaa tanan sa Plaridel, Misamis Occidental.
Niadtong Huwebes sa hapon human gisusi sa doktor ang patayng lawas, gilubong ra dayon tungod sa kabaho. (Stephanie V. Berganio)
Gipatik sa mantalaang SuperBalita Cagayan de Oro Agosto 06, 2011. Linkback:
https://tubagbohol.mikeligalig.com/index.php?topic=42738.0
