Ni KRIS C. SIALANA
USA ka tindero sa luy-ahan ang gidagit sa pito ka mga lalaki niadtong milabay nga adlaw mga alas 8:36 sa gabii sa Vegetable landing area, West Bound Terminal, Bulua sa dakbayan sa Cagayan de Oro.
Naila ang biktima nga mao si Ryan Mahid (bansagon gipugngan), 19, lumad nga taga Dilabayan, Kauswagan, Lanao del Norte.
Sa impormasiyon gikan sa Police Station 7 (PS7) sa Bulua nasayran nga gipick-up ang biktima sa terminal ug pugsanong gipasakay sa itom nga Toyota Fortuner Wagon ug nagpahaguros sa pagpadagan paingon sa siyudad sa Iligan nga direksiyon.
Apan nasikop ang mga suspetsado human nga nakigkoordinar ang kapolisan sa nahisgutang dapit ug na flash alarm ang maong insidente.
Si Senior Police Officer 3 Dominador Datahan sa PS7 mibutyag nga padayon pa ang giimbestigahan sa maong insidente ilabi na ang motibo sa maong pagsulay sa pagpangidnap gumikan kay kung may kalabotan sa kwarta usa lang man kini ka tindero diha sa merkado.
“Mao ka nay usa sa atong galantawon nganong misangko sa pagpangidnap nga ang iyang trabaho sumala sa gikabutyag nga tindero man siya sa luy-ahan,†saysay ni Datahan.
Gidugang pa nga kalit lamang nga giduolan ang maong biktima sa wala maila nga suspetsado diin ang duha niini maoy nigunit sa kamot samtang ang usa ang miti-on sa wala masutang klase sa armas.
Pugsanon nga gipasakay ang biktima sa nakaparada nga sakyanan diin atoa ang laing mga suspetsado apan swerteng nasikop kini diha sa Libertad highway samtang nagpahigayon ang kapolisan og checkpoint kalabot na usab sa maong insidente.
Nagkadugo ang biktima dihang nakuha tungod kay gihapak kini og gahi nga butang sa mga suspetsado.
Naluwas ang maong biktima ug narekober pa gikan sa posisyon sa mga suspek ang kalibre .45 ug 380 nga armas.
Gipasaka na ang kasong kidnapping kalabot na sa mga suspetsado samtang padayon pa nga gisuta ang motibo sa maong pagpangidnap.
Gipatik sa mantalaang Superbalita Cagayan de Oro Disyembre 16, 2015.
Linkback:
https://tubagbohol.mikeligalig.com/index.php?topic=81577.0
