Ni JEEPY P. COMPIO
NAGMINGHOY nga midangop sa pulis ang usa ka lalaki human gihimulbolan sa babaye nga iyang gikauban sa usa ka lodging house sa Barangay Matina Aplaya, dakbayan sa Davao, alas dos kagahapon sa kaadlawon, Sabado.
Midangop sa Talomo Police Station si William (bansagon gitago sa Superbalita), 26, ulitawo, taga Barangay 5-A, Bankerohan ning dakbayan human gidala sa babaye ang iyang pitaka nga dunay sud nga P5 mil.
Una niini, usa ka alyas Maricar ang nakaila ni William ug nagsabot sila nga maglipay sa kama maong misulod sa inn.
Segun ni William nga gusto sa babaye nga mag-inom og ilimnong makahubog una sila mag-sex, apan dihang nahubog na, nakatagpilaw ang ulitawo ug nagpasumangil ang babaye nga mopalit una og sigarilyo.
Giingong gilamok na lang og pinaabot si William sa pultahan kay nakamata kini nga wala na ang babaye sa iyang tupad.
Dihang paghiling niya sa iyang bag, wala na ang iyang pitaka nga dunay sud nga P5 mil ug ang iyang mga personal nga gamit sud sa bag.
Igo na lang sa pagpa-blotter ang biktima kinsa nagminghoy kay gitangag na ang iyang kuwarta ug wa pa gayud siya makaremedyo sa babaye.
Ang kaso anaa na sa Theft and Robbery Section sa Talomo PNP.
Gipatik sa mantalaang Superbalita Davao Hulyo 02, 2016.
Linkback:
https://tubagbohol.mikeligalig.com/index.php?topic=82478.0