Ni Flor V. Querubin
Thursday, January 20, 2011
GIPASAGDAN lang una sa kapulisan ang usa ka lalake nga nikatkat sa bridge tower sa Marcelo Fernan Bridge habig sa dakbayan sa Mandaue hangtod nga manaog sa iyang kaugalingon.
Sa pagsuwat ning balita, wa pa gyud mopakitag timailhan nga mokanaog ang mao nga wa mailhing lalake.
Nagduda ang mga rescuer nga way tinguha nga molayat ang maong lalake ug naatol lang nga nasakpan nga namutol ug gipangawat ang kable sa kuryente sa tulay nga iyang gisud sa sako.
Kagahapon sa mga ala 1:30 sa kaadlawon, gipaundang na ni PSSupt. Anthony Obenza, hepe sa Lapu-Lapu City Police Office (LLCPO), ang pag-rescue sa lalake sa dihang nagdumili gyud sa pagsanong sa gihimong negotiation sa pagpakanaog gikan sa iyang gitungtongan.“We have terminated our efforts… We have involved so many people, but our efforts were unproductive,†matod ni Obenza.
Apan adunay mga pulis nga nag-atang sa ubos sa bridge tower sa higayon nga mokanaog di maglangay ang kapulisan sa pagdakop kaniya.
Gitug-an sa opisyal nga wa silay nakita nga tinguha nga molayat ang maong lalake, sigun sa paghulagway ni PSupt. Clifford Gairanod, Deputy for Operations sa LLCPO, usa sa nakig-negotiate ginamit ang aerial ladder sa Special Rescue Unit (SRU) sa Bureau of Fire and Protection (BFP).
Namatikdan usab nga nahadlok kini. Gawas nga nagkurog, usa sa iyang mga kamot iyang gihigtan sa nylon rope samtang ang tumoy iyang gibaat sa nagbuntaog nga railings sa tinguha nga di matagak sa 60 ka mga tiil nga bridge tower.
“We consider him a thief,†pamahayag ni Obenza.
Nagsugod sa alas 4 sa hapon niadtong Miyerkules nga gisuwayan sa pagpakanaog ang maong lalake kinsa nitug-an nga taga isla siya sa Negros.
Nisuway pagsaka ang kapulisan agi sa hagdanan apan nihana nga iyang itaroy ang iyang gidala nga pinote sa higayon nga adunay mosaka.
Ni-request na si Obenza og aerial ladder sa BFP Regional Office aron nga sak-on ug pangutan-on unsay iyang gusto, bugtong pan ug tubig ingon man pisi nga sama sa gigamit sa negotiator nga harness ang iyang gipangayo.
Sud sa tulo ka higayon nga gibalik-balikan og saka nila ni Gairanod ug PInsp. Jacinto Mandal ang maong lalake diin unang attempt siya gidad-an og usa ka putos nga pan, wa kini niya masawo ingon man ang binotelya nga tubig.
Gitunolan og balik sa bottled water apan iyang giuli sa dihang di silyado ang botelya.
Base sa paghulagway ni Gairanod nga mamahimo nilang pugson sa pagpakanaog ang maong lalake bisan pa man nga armado kini og hinagiban, apan ilang nasuta nga limitado ang space diin siya nagluko.
Gikabalak-an ni Obenza nga atol unya sa karambola didto sa ibabaw nga bahin basin ang iyang sakop maoy maligid ug mahulog sa taytayan.
Nakahukom ang opisyal nga human sa kapin sa siyam ka oras nga negosasyon nagmagahi gihapon ang maong lalake hinungdan nga ila na kining gipabiyaan.
Nasayran nga base sa monitoring sa Regional Maritime Office (RMO) 7 kinsa maoy unang nakakita sa usa ka lalake diha sa ibabaw sa bridge tower base sa CCTV camera sa taytayan, sa dihang gi-verify, di kini kawani nga posible namintal sa dapit.
Nasuta nga k******n ang maong lalake nga nagdala og pinote ug sako ingon man improvised nga hagdanan, nangaputol usab ang mga electrical wire sa duha ka fog lamp nga diha sa ubos sa bridge tower.
Gipatik sa mantalaang SuperBalita Cebu Enero 21, 2011. Linkback:
https://tubagbohol.mikeligalig.com/index.php?topic=36809.0
