MikeLigalig.com

Ni Guam P. Logroño
Friday, November 30, 2012


CEBU CITY -- Usa ka lalakeng trabahante namatay human gibalikusan sa usa ka dakong bitin nga iyang gisignit daplin sa dalan niadtong Huwebes sa alas 9:30 sa gabii sa sitio Atabay, Barangay Macaas, lungsod sa Catmon.

Si Alvin Sususco, 37, minyo, nagpuyo sa nahisgutang lugar, namatay human gibalikusan sa gibana-banang tres metros nga gitas-on nga sawa nga may gidak-on sa braso sa usa ka tawo.

Si PO3 Ben Navales, desk officer sa Catmon police nga nahinabi sa Sun.Star SuperBalita, niingon nga si Sususco, kuyog sa iyang ig-agaw nga si Janel, nanuroy sa may kasagbutan sa ilang lugar.

Apan sa pag-abot nila sa maong dapit, nakit-an nila ang sawa nga nagluko.

Si Janel nibadlong sa iyang ig-agaw nga di na lang hilabtan ang bitin.

Apan wa mopatuo, gisignit niya ang ulo sa bitin nga nagluko apan nisukol kini, nibalikos kini sa iyang lawas ingon man gipaak siya dihang nakalugnot gikan sa iyang pagbuhi.

Nitabang unta ang iyang ig-agaw apan nangisog og maayo ang bitin, gibalikusan og maayo ang biktima ingon man gipaak makadaghan.

Tungod kay wa silay dalang hinagiban, mikaratil sa pagdagan si Janel aron pagpangayog panabang sa ilang mga paryente.

Sa pagbalik nila sa lugar, ang biktima naglungaylungay na ang liog ug nawad-an sa panimoot nga gibalikusan pa sa bitin ug naputos ang lawas niini sa daghang pinaakan.

Tungod niini, wa maglangay ang iyang mga paryente sa pag-rescue, napugos sila sa pagtigbas sa bitin.

Apan uwahi na kay ang biktima nakabsan sa iyang kinabuhi. (Sun.Star SuperBalita Cebu)

Linkback: https://tubagbohol.mikeligalig.com/index.php?topic=60059.0