Saturday, September 4, 2010
by Jose Lewis Gachalian, USJR Masscom Intern
DUHA ka managhigalang batang lalake giingong gipagunit ug gipaduwa-duwa sa kinatawo sa usa ka minyong lalake sulod sa banyo sa Middle Tabucanal, Brgy. Pardo, dakbayan sa Sugbo.
Ang mga biktima nga pulos nagpanuigon og 7-anyos ug ang suspek nga 28-anyos nga lalakeng minyo nagpuyo ra sab sa maong dapit. Ilang mga ngan gipugngan.
Ang giingong pagpanghilabot nahitabo niadtong Biyernes alas 6 sa gabii sulod sa banyo sa Pardo Public Library.
Matud pa sa mga kabanay sa mga biktima nga nitaho sa kapulisan sa Pardo nga nagduwa ra sa gawas sa library ang mga bata kuyog sa usa ka maguwang nga babaye.
Gitawag ang duha ka mga bata sa suspek ug gipasulod sa library. Gipapauli sab niya ang maguwang nga babaye.
Matod sa mga bata nga gisaaran sila sa suspek nga hatagan og duwaan nga clay kon motuman sila sa iyang gusto.
Gidala sila sa sulod sa banyo ug gibuhat ang paghilabot. Apan pagkahuman igo ra sila giingnan sa suspek sa pagpanguli.
Pagka gabii niana, nisumbong ang usa sa mga biktima sa iyang maguwang sa nahitabo ug ila kining gi-report sa Women’s Desk sa Pardo police station.
Matod pa sa lola sa usa sa mga biktima nga naghilom-hilom ra gayud ang duha ka mga biktima sa kahadlok nga sila unyay makasab-an sa ilang mga ginikanan.
Kay nihangyo man ang usa sa mga biktima sa iyang maguwang sa di pagsumbong kay mahadlok siya makasab-an.
Ang depensa sab sa inahan sa suspek nga ang maong mga bata maoy nag-una-una sa pagpanghagit sa suspek.
Kay niadtong higayona, nigamit lang sa kasilyas ang iyang anak ug ang mga bata ang nisulod sa library kay ang duha mga bayut.
Gipadayon sa Women’s Desk ang imbestigasyon kabahin sa maong panghitabo.
Gipailawom na sab og physical exam ang mga biktima aron ang resulta mamahimong basehanan sab sa kasong ipasaka batok sa suspek.
Ang suspek gitanggong sa Pardo police station samtang gipaabot ang pagpasaka sa kasong kalapasan sa Republic Act (RA) 7610 kun Child Abuse Protection Act unya sa Lunes.
Gipatik sa mantalaang Sun.Star Superbalita Cebu sa Septiyembre 5, 2010.Linkback:
https://tubagbohol.mikeligalig.com/index.php?topic=31747.0
