Ni Guam P. Logroño
Wednesday, June 25, 2014
KINATAWO sa chief tanod posibleng maputol human naigo sa bala sa kalibre .45 nga pistola human siya gipusil samtang natulog sulod sa balay kagahapon sa alas 3:20 sa kaadlawon sa Barangay Papan, Sibonga, Sugbo.
Si William Fernandez, 33, minyo, chief tanod sa lugar, gipaubos sa operation sa usa ka pribadong tambalanan dinhi sa dakbayan sa Sugbo.
Si PO2 Ederlino Bacusmo, imbestigador sa Sibonga Police nga nahinabi sa Sun.Star Superbalita nagkanayon nga nahinanok ang biktima uban sa iyang asawa ug anak.
Apan nakamata siya human nadunggan ang usa ka sipang buto sa armas.
Iyang gidali sa pagsusi ug gitan-aw sa gawas kun si kinsay nagpabuto dihang nabantayan niya nga naigo diay siya.
Sa pagtan-aw niya sa iyang bugan, maayong pagka-igo sa “punoan sa iyang kinatawo,†matod ni Bacusmo.
Ang biktima nagping-it niini sa kasakit nga nangayog panabang sa iyang asawa.
Ang biktima gidala sa iyang asawa ug kabanay sa tambalanan sa dakbayan sa Carcar, apan wa maglaÂngay, gibalhin sa usa ka pribadong tambalanan sa dakbayan sa Sugbo.
Si Ederlino niingon nga usa ka kabhang sa kalibre .45 nga pistola ang ilang nasakmit sa sa crime scene nga maoy gigamit sa wa mailhing gunman.
“Ang ingon sa asawa nga punoan gyud sa kinatawo sa iyang bana nasentro sa pagka-igo! Pwerting pagkatumbaha. Depende na lang unya to sa doktor kon putlon o sumpayon,†dugang ni Bacusmo.
Nagtuo siya nga dakong kadaut ang namugna sa bala ngadto sa kinatawo sa biktima sanglit ang kalibre pusil high-powered.
Gipadayag niini nga way kontra ang biktima sa lugar hinungdan nga naglibog ang pamilya nganong gipusil nga gipaagi lang sa bintana.
Matod ni Bacusmo nga naigo ang kahoy nga bintana unya milapos ang bala tumong ngadto sa punoan sa kinatawo sa biktima.
Linkback:
https://tubagbohol.mikeligalig.com/index.php?topic=78543.0
