Ni STEPHANIE V. BERGANIO
GIKABALAKA karon nga basin moabot na dinhi sa Northern Mindanao ang pekeng bugas nga nadiskubre sa Dakbayan sa Davao.
Gibutyag ni Helen Osin, Regional President sa Confederation of Grains and Retailers Association of the Philippine Inc. (GRECON- Northern Mindanao) nga kini gyod ang ilang gihatagan og pagtagad ning panahona.
Tungod sa migawas nga report, miawhag kini sa katawhan nga susihon og maayo ang ilang bugas nga gipalit sa kamerkadohan.
Matod niini nga timailhan sa pekeng bugas, mamatikdan ang grabeng kaputi, kasinaw nga giingong hinimo sa tam-is nga patatas ug gisagolan sa plastic nga raisins.
Ang plastic maoy delikado kaayo sa panglawas tungod kay dako ang kadaot niini sa digestive system sa tawo nga makakaon niini.
Gawas niini, dili mapan-os ang pekeng bugas sulod sa upat ka adlaw ug kung kumoton mogawas ang tubig ug humot usab kini tungod sa gibutang nga spray.
Aghat ni Osin sa katawhan sa siyudad ug tibuok rehiyon nga magbinantayon sa ilang gipalit aron dili mabiktima niining pekeng bugas.
Dugang niini nga mas luwas nga paliton ang bugas nga gisusi sa National Food Authority (NFA) tungod kay miagi kini sa quality controller.
Pipila usab ka mamaligyaay sa merkado sa Cogon miingon nga dili mahitabo nga makapamaligya sila sa ingon nianang klase sa bugas tungod kay kwalidad ang ilang gitinguha ug dili nila buot madaot ug mahilo ilang mga kostumer.
Gipatik sa mantalaang SuperBalita Cagayan de Oro Hulyo 02, 2015.
Linkback:
https://tubagbohol.mikeligalig.com/index.php?topic=80322.0
Topic: Katawhan gihimangnoan kontra pekeng bugas (Read 491 times)