MikeLigalig.com

Ni KRIS C. SIALANA


NAGPAALIM pa sa balay tambalanan ang usa ka lalaki human giluba sa kanhi bana sa iyang kasamtangan nga kaipon kagahapon sa kaadlawon sa Agora ning siyudad sa Cagayan de Oro.

Ang biktima naila nga mao si Eric (Bansagon gipugngan), 33, lumolupyo sa San Isidro Labrador, Agora ning siyudad.

Gisaysay ni Mariza, kaipon sa biktima, nga gihatod siya ni Eric para manakayan paingon sa Cogon Market, apan sa dihang pauli na ang biktima, wala kini masayod nga giatangan na diay kini sa suspetsado.

Giingong kalit nga gidunggab sa kanhing bana ni Mariza nga si Daniel ang biktima ginamit ang cutter, hinungdan sa pagkalanding ni Eric sa Northern Mindanao Medical Center human kini makaangkon og samad sa iyang agtang ug duha sa iyang kamot.

Gikabutyag nga ang motibo sa maong pagpangdunggab gumikan na usab nga buot sa suspetsado nga makigbalik sa iyang asawa.

Sa pagsulat niini nga balita, ang biktima pabilin pa nga nagpaalim samtang ang suspetsado giingong gawasnon pa hangtod karong panahona.


Gipatik sa mantalaang SuperBalita Cagayan de Oro Agosto 12, 2015.