Ni Teddy Cabana
Wednesday, February 20, 2013
DAVAO DEL NORTE -- Usa ka dalaga ang gilugos sud sa iyang boarding house pipila ka oras human siya nagparaspa sa ospital alas 11 sa gabii niadtong Lunes didto sa Barangay Apokon, siyudad sa Tagum.
Ang biktima gitago lang sa alyas Kim, 18, taga Peñaplata, Island Garden City of Samal, samtang ang suspetsado giila usab sa alyas nga Willy, hamtong ang pangedaron, liaison officer sa lokal nga kagamhanan sa Maco nga nadestino sa Davao Regional Hospital (DRH) sa Tagum.
Gisaysay ni Kim nga gikan siya sa ospital sa DRH gumikan sa pagsige ug awas sa iyang dugo sanglit nasayrang buntis siya ug usa ka bulan.
Ang iyang uyab matud pa maoy miabag sa pagbayad sa ospital.
Apan pasado alas 4:00 sa hapon niadtong Lunes, nagkaproblema si Kim sa kulang sa iyang bayad nga P2,500 aron nga makagawas human siya giraspahan.
Sumala pa nga mihanyag ang suspetsado nga si Willy nga maoy modupa sa iyang balayrunon sa ospital.
Dugang pa sa suspek nga aron sab nga di siya madak-an sa balayrunon, didto siya papuy-on sa iyang boarding house nga atbang lang sa DRH.
Gisulti ni Kim nga dihang nakasulod na siya sa kuwarto ni Willy, gipugos siyang pahimuslan base sa nakitang mga bun-og ug labhag sa iyang paa agi sa sinumbagan.
Kagahapon, nakalugar si Kim sa pagdangop sa iyang paryente nga maoy nangayo ug tabang ngadto kang Davao del Norte Vice Governor Victorio Suaybaguio.
Human sa tambag ni Board Member Joey Millan ngadto sa biktima, gilayon giproseso ang pagpasang-at ug kaso batok kang Willy.
Ug kagahapon nasayran nga gihikay na ang kasong lugos nga ipasaka batok sa suspek ngadto piskalya sa siyudad sa Tagum. --
http://www.sunstar.com.ph/Linkback:
https://tubagbohol.mikeligalig.com/index.php?topic=68976.0
