MikeLigalig.com

Ni Bryner L. Diaz (Banat) | Updated October 12, 2015 - 12:00am
 


Sumala pa sa kapolisan, naigo ang ubol-ubol sa biktima hinungdan sa iyang hinanaling kamatayon dungan sab sa pagsibat sa suspek. Philstar.com/File


CEBU, Philippines – Gilaslas og sanggot ang liog sa usa ka lalaki sa iya rang kainom human kini matulog sa ilang gitagayan sa barangay Duyan, Catmon.

Ang namatay naila nga si Concordio Nieves, 42, taga Sitio Cambatiti, barangay Duyan sa lungsod sa Carmen.

Samtang ang suspek naila nga si Julius Puno, 39, taga Purok Atis, Barangay Corazon, Catmon.

Si Senior Police Officer 2 Cresente Armamento, desk officer sa Catmon Police Station nga nahinabi sa Banat News miingon nga nag-inom pa ang duha kauban sa ilang mga higala sa miaging udto.

Naglingaw-lingaw pa sila ug nag-ihaw og iro nga ilang gisumsuman.

Apan nianang pagkahapon na, gikatahong nakatulog ang biktima diha sa ilang giimnan butang nga gikasuko sa suspek ug mikuha kini og sanggot dayong gulgol sa liog sa biktima.

Sumala pa sa kapolisan, naigo ang ubol-ubol sa biktima hinungdan sa iyang hinanaling kamatayon dungan sab sa pagsibat sa suspek.

“Gikuptan ang ulo, tulog (ang biktima) way dag-anan, naigo mang ubol-ubol, loss of blood gyud ni,” dugang pa ni Armamento.

Ang kapolisan daling milusad og operasyon pagpangita sa suspek nga miresulta sa iyang pagkasikop.

Nagtoo si Armamento nga daan nang adunay bikil ang suspek ug ang biktima ug nakakita kini og higayon dihang tulog ang biktima.

Karong adlawa pasakaan og kasong murder ang suspek ngadto sa Provincial Prosecutor’s Office. - /EIM) (BANAT NEWS)

Linkback: https://tubagbohol.mikeligalig.com/index.php?topic=81146.0