http://bisayanews.com/Updated July 17, 2014
COTABATO CITY – Usa ka kabaw nga nakagawas sa slaughter house ang naghuramentado ug nakabalda sa dagan sa trapiko ning siyudad alas 8:20 sa buntag niadtong Miyerkules.
Gibutyag ni City Veterinarian Dr. Robert Malcontento nga nasakitan ang kabaw sa diha nga gibunalan siya sa mang-iihaw pasulod sa slaughter house.
Nakabuhi ang hayop ug nakagawas sa slaughter house hinungdan nga nakadagan subay sa dalang Pansacala didto sa Barangay Rosary Heights 10 ug milusot sa Sinsuat Avenue.
Nasayran nga gisungay sa kabaw ang duha ka tindahan nga dunay tinda nga sud-an apil na ang duha ka motorsiklo nga nagparking kilid sa kalsada.
Nagpatunga ang hayop sa National Highway sa Sinsuat Avenue, diin iyang gipangsungag ang mga sakyanan nga iyang masugatan.
Dali sab nga nanawag ang mga tawo sa mga otoridad aron nga makontrola ang kabaw nga nanghasi.
Abtik sab nga nakaresponde ang mga ginsakpan sa kapulisan sa hitabo.
Gumikan kay di na makontrola ang paghuramentado sa kabaw, nakahukom ang mga pulis nga pusilon na lang kini tumong sa ulo hinungdan sa kamatayon niini.
Nagtuo si Malcontento nga miikyas ang kabaw gikan sa slaughter house sa kahadlok nga siya ihawon. Apan wala gihapoy suwerte ang hayop, nakarne gipapon intawon kay napatay man siya sa mga pulis.
Linkback:
https://tubagbohol.mikeligalig.com/index.php?topic=78814.0