SuperBalita Cebu
Wednesday, August 13, 2014
GIDUDAHANG nangawat gipusil patay sa usa ka security guard sa North Reclamation Area, dakbayan sa Mandaue niadtong Dominggo sa gabii.
Ang lawas sa biktima gitaguan sa imburnal, apan giingong nakonsensya ang sikyu, nisulti sa iyang amo labot sa hitabo.
Ang guwardiya nga nakapusil giila sa kapulisan nga si Marvin Villagracia, 20, sakop sa Bisda Security Agency, nadestino sa M1 Business Center nga nahimutang sa Ouano Ave. North Reclamation Area, Barangay Subangdaku.
Matod ni Villagracia nga ang suspek nibunot og armas dihang iyang gibadlong sa pagpangawat og cable wire ug puthaw.
Apan giingong nailog sa gwardya ang pusil ug maoy iyang gigamit pagpusil sa wa mailhing lalaki ug pagkahuman iyang gitagoan sa imburnal.
Pasado na alas 8 sa gabii niadtong Martes naugkat sa mga sakop sa Scene of the Crime Operatives ang lawas.
Gitug-an sa mga sakop sa Soco nga naglisod sila pag-ugkat sa lawas gikan sa imburnal sanglit giingong maayo kini pagkapasok sa ilawom.
Ning pagsuwat, wa pa mailhi ang mao nga lalaki, kinsa nagsul-ob og maroon nga senina, itom nga short pants, gibana-banang may pangidaron nga 40 pataas.
Si Sr.Insp. Miguel Andeza,hepe sa Subangdaku police station, niingon ngaang tag-iya sa establisemento nga gibantayan ni Villagracia maoy mipahibawo kanila human mi-surrender ang security guard ug nikompisal sa supervisor sa security agency labot sa nahitabo.
Linkback: https://tubagbohol.mikeligalig.com/index.php?topic=78872.0
