NAA sa kritikal nga kahimtang ang usa ka engineer samtang nangaangol ang iyang duha ka mga kauban sa construction human sila gipamusil ug gikulata tungod sa usa ka babaye sulod sa imnanan kagahapon sa ala 1:40 sa kadlawon sa F. Rallota street, Barangay, Poblacion, dakbayan sa Danao.
Si Jerick Felisardo, 35, minyo, taga Camarines Sur, temporaryong nagpuyo sa nahisgutang lugar, kritikal tungod sa samad pinusilan sa iyang buko-buko.
Samtang naangol ang iyang mga kauban nga sila si Zeus Dulos, 25, ulitawo, technician, taga Quezon City, kinsa samdan sa walang paa samtang mga bun-og sa kalawasan ang naangkon ni Joey Marquez.
Tulo ka wa mailhing mga lalake maoy gipangtumbok nga namusil ug nangulata. Paspas kaayo kining nahanaw human sa pagpamusil.
Si SPO2 Ildefonso Prusia, desk officer sa Danao Police nga nahinabi sa Sun.Star Superbalita, nagkanayon nga “tungod sa maanyag nga babaye,†gipamusil ang mga biktima.
Matod ni Prusia nga sa wa pa ang krimen, ang mga biktima nanag-inom, diin ang usa ka maanyag nga babaye ni-table sa mga biktima.
Si Felisardo ingon man mga technician maoy gipili sa maong babaye nga nagbalhinbalhin sa pagpasabak samtang ang tulo ka mga gunman nanag-inom sab sa maong imnanan.
Si Prusia niingon nga nasuyaan ang mga biktima sa mao nga mga lalake sanglit maoy gipili sa babaye sa pagpasabak.
Ang tulo gikatahong unang ningkanaog sa imnanan.
Mga ala 1:40 sa kaadlawon, nakahukom kini nga mamauli.
Samtang nagpaabot sa traysikad nga ilang kasakyan, usa sa tulo kalit nga ningduol dayon gikulata si Marquez.
Sila si Felisardo ug Dulos ningtabang sa ilang kauban apan gipamusil sila sa duha ka mga kauban nga pulos nagdalag armas.
Duha ka mga kabhang sa kalibre .45 nga pistola ang narekober sa kapulisan sa crime scene.
Giklaro ni Prusia nga tataw kaayong gisuyaan lang gyud ang mga biktima sa mao nga mga lalake kay wa tagda sa maanyag nga babaye.
Ilang gipangita ang maong babaye kay maoy makatabang sa imbestigasyon sa kapulisan kay maoy nakaila sa mga namusil.
Linkback:
https://tubagbohol.mikeligalig.com/index.php?topic=56950.0
