Ni Lesley Caminade (Banat) Updated April 03, 2012 12:00 AM
CEBU, Philippines - Usa ka inahan ang nangayo og tabang sa buhatan sa The Freeman/Banat News human siya giingong wala tagda sa usa ka buhatan sa Police Regional Office (PRO)-7 kalabot sa nahitabo sa iyang anak nga menor de edad.
Ang inahan kinsa dili buot magpahingalan mibutyag sa Banat News nga sa miaging bulan nakugang siya dihang dunay mga polis ang mipakita kaniya og hulagway sa naghubong mga babaye gikan sa usa ka porn site.
Sa dihang iya kining gitan-aw nanglugmaw ang iyang luha sa dihang usa sa mga naghubong babaye mao ang iyang 14-anyos nga anak, ang maong hulagway wala gyuy sapot ang bata nga nagladlad sa pribadong parte sa lawas niini.
Ang inahan kinsa mihangyong dili ipublikar ang mga pangalan sa mga opisyales ug buhatan sa kapolisan nga iyang giduol apan wala motagad kaniya miingon nga naglibog na siya karon kung asa moduol aron matabangan ang iyang anak.
Matud pa niini ang iyang anak misaysay nga sa miaging bulan sa Oktubre sa nakalabay’ng tuig gi-recruit kini og usa ka bayut ug gidala sa usa ka downtown hotel ug gitanyagan og P4 mil aron magpakuha og hubo nga litrato. Sumala pa nga ang bayut maoy mikuha sa mga litrato ug gipagamit usab ang camera sa bata aron maoy mokuha sa kaugalingong hulagway. Matud pa nga mipasalig ang bayut nga di i-post sa internet ang maong hulagway.
Mibutyag usab ang bata matud pa sa inahan nga gipasuyop kini sa bayut og ilegal nga drugas sa wala pa magsugod ang pagkuha sa picture.
Dugang pa sa inahan gawas sa iyang anak aduna pay ubang tulo ka menor de edad nga susama og gipabuhat sa maong bayut kinsa dunay kuyog nga langyaw ug laing duha ka lalaki.
Apan sa pagdangop sa inahan sa usa ka buhatan sa PRO-7 aron unta magpatabang sa usa ka opisyal giingong giingnan siya sa non-uniformed personnel (NUP) nga wala diha ang maong opisyal. Matud pa niya una pa siya tug-ani kung hain ang opisyal gipaabot pa siya niini og dugay.
Tungod sa gibating kahiubos ug pagbating daw gibiay-biayan lang siya midangop siya ning pamantalaan aron magpatabang asa siya nga ahensya o organisasyon siya matabangan.
Kagahapon sa hapon midangop ang inahan sa International Justice Mission (IJM) nga usa ka organisasyong nangusog sa kampanya batok human trafficking ug midangop usab siya sa Department of Social Welfare and Development (DSWD).
Ang maong inahan miingong wala siyay laing tinguha kondili ang pagpatangtang lang sa mga hulagway sa iyang anak sa maong porn site ug kung unsaon pagtaral sa hukmanan sa mga tawong mihimo niini.
Ang Banat News misuway og kontak sa opisyal nga gibisitahan sa inahan apan dili makontak ang telepono niini. EIM - (BANAT NEWS)
Linkback:
https://tubagbohol.mikeligalig.com/index.php?topic=49051.0
