Ni Lesley Caminade-Vestil (Banat) Updated August 28, 2011 12:00 AM
CEBU, Philippines - Himabaw sa P100 mil ang kantidad sa mga alahas nga nawagtang sa usa ka British national human kini kawata sa usa ka babayeng bag-ohay lang naamiga niya ug nakig-inom kaniya sa usa ka bar sa eskina Rosal ug Escario sa barangay Kamputhaw ning dakbayan sa Sugbo sa miaging hapon.
Ang biktima nailhan nga si Dave West, 67, molupyo sa Golden Meadow Subdivision barangay Gabi lungsod sa Cordova, samtang ang suspetsado nagpaila lang sa ngalang Christine, 29, nga taga Leyte.
Sa pakighinabi sa Banat News ni Greg Tan higala sa biktima kini mibutyag nga ang biktima ug ang suspetsado didto magkaila sa usa ka bilyaran ning dakbayan.
Dihang nagkasuod na ang duha , giimbitar dayon sa Briton ang babaye og paniudto sa usa ka kan-anan. Kini human maka-withdraw og kuwarta ang biktima gikan sa usa ka ATM, una mopaingon ngadto sa usa ka restawran.
Human sila maniudto nag-inom ang biktima ug ang suspetsado sa maong kan-anan hangtod nga dihang naglami na ang ilang panagsuod nakahunahuna sila sa pagsulod sa usa ka imnanan sa eskina Escario ug Rosal, sa Kamputhaw.
Apan sa tanto nilang inom, hingpit nga gipanglimotan sa kahubog ang biktima ug kalit kining gibiyaan sa suspetsado kinsa mihangyo sa security guard sa maong imnanan nga ipatan-aw lang ang biktima kay iya kining balikon.
Apan pila nalang ka oras ang milabay wala na gayud mobalik ang suspetsado ug dihang nahuwasan ang biktima, mao nalay nadiskobrehan niini nga nawagtang na ang iyang mga alahas ug ang iyang salapi.
Ang maong mga alahas mao ang gold necklace nga nagkantidad og 400 pounds, cell phone nga nagkantidad og P11 mil kapin, wedding ring, men ring nga adunay green sapphire stone, ug kwarta nga nagkantidad og P75 mil.
Walay nahimo ang biktima gawas sa pagsumbong ngadto sa kapolisan sa nahitabo kaniya ug giisip na usab sa mga otoridad nga laing kaso kini sa kawat .(WC) (BANATNEWS)
Linkback:
https://tubagbohol.mikeligalig.com/index.php?topic=43189.0
