Ni STEPHANIE VIOVICENTE-BERGANIO
SUSIHON sa simbahan ug kaparian ang gi-ingong paghilak og dugo sa imahen sa Birhen sa Lourdes sa usa ka kapilya nga nahimutang sa Barangay Liloan, lungsod sa Catarman, probinsya sa Camiguin niadtong Martes.
Gibutyag ni Rev. Fr. Rickets Dancila, parish priest sa Catarman, nga wala niya mismo nakita and gi-ingong paghilak og dugo sa birhen ug nadungog lang niya kini sa katawhan ug nakita ang hulagway nga gi-post sa Facebook.
Apan butyag ni Dancila nga iya kining susihon ug imbestigaran kung unsa kini ka tinoud, hilabi na daghan ang nakurat ug nakapangutana kung unsa'y tilimad-on niini.
Namatikdan nga presko ang dugo nga migawas gikan sa mata sa imahen sa birhen ug nag-abli ang nag-ampo niini nga mga kamot niadtong buntag sa Martes.
Gibutyag ni Dancila nga ang Simbahang Katoliko dili basta motuo niini kay ipaagi pa man kini sa hingpit nga pagsusi kung tinuod kini ug usa kini ka dakong milagro.
Gipasabot niini nga ang maong kapilya sa Birhen sa Lourdes kanunay nga dagsaon sa mga deboto, ug matag adlaw, duna'y mga mag-meditate sa dapit.
Daw bisan kinsa nga makakita niini aduna'y nagkadaiyang opinyon ug gibutyag ni Dancila nga dili mapugngan ang katawhan kung ilang isulti ang ilang nakita kay kabahin kini sa ilang pagtuo.
Gipatik sa mantalaang SuperBalita Cagayan de Oro Mayo 27, 2015.
Linkback:
https://tubagbohol.mikeligalig.com/index.php?topic=80048.0
