Ni Lesley Caminade-Vestil (Banat) Updated April 16, 2011 12:00 AM
CEBU, Philippines - Nakugang nalang ang mga residente sa sitio Tinanan barangay Sirao ning dakbayan human mapalgi ang gitagod-tagod nga rebolto ni Sr. Sto. Niño sulod sa ilang kapilya.
Sa report sa ABS-CBN Central Visayas, usa ka Margie Entong ang mibutyag nga ang iyang anak maoy nakadiskubre sa pagkawagtang sa maong rebolto sa altar nga nahimutangan niini sa ilang kapilya.
Tungod niini dali niyang gipangita ang maong rebolto sa palibot ug nakugang nalang sila dihang ila kining napalgan nga putol na ang ulo ug daghan ang tinigbasan sa lawas niini.
Dako ang pagtuo sa mga residente sa maong barangay nga gituyo sa pagtagod-tagod ang imahen ni Sr. Sto. Niño ug posibleng gihimo kini sa miaging gabii nga walay makakita.
Nasayran usab nga niadtong tuig 2009 nahitabo usab ang susamang pagpunggot sa tulo ka imahen sa mao gihapong kapilya nga mao ang imahen ni Sr. Sto. Niño, imahen ni Birhen Maria ug imahen ni Sr. San Vicente.
Ang mga residente aduna nay gidudahang tawo nga maoy mibastos sa kasagrado sa ilang pagtuo ug ang mao gihapong tawo maoy ilang gisuspetsahang responsable sa nahitabo gihapong pagpamunggot sa imahen niadtong 2009. (BANATNEWS)
Linkback:
https://tubagbohol.mikeligalig.com/index.php?topic=40161.0
