Naghuramentado
Ni Darrel Carumba (Banat) Updated March 27, 2011 12:00 AM
CEBU, Philippines - Tulo ang patay apil na ang 3-anyos nga batang babaye human nag-huramentado ang apohan niini nga kalit midunggab patay sa iyang kaugalingong anak ug apo ug pagkahuman nagpusil usab sa iyang kaugalingon diha sa ulo diha sa barangay Campo sa lungsod sa San Francisco isla sa Camotes niadtong Biyernes sa alas 7:36 sa gabii.
Ang mga biktima mao ang anak niini nga 16 anyos nga si Kevin Donaire, ug apo sa suspek nga si Samantha Medillo, 3, nga mga molupyo sa nahisgutang lugar.
Samtang ang suspek mao ra ang amahan ug apohan sa mga biktima nga si Lucas Donaire, 47.
Matud pa ni PO2 Rex Donaire sa San Francisco Police dihang nahinabi sa Banat News subay sa imbestigasyon ang asawa sa suspek maoy unang gipusil niini apan nakadagan pahilayo apan nabiyaan ang mga biktima.
Dihang ang mga biktima nalang ang diha sa balay gidunggab sa suspek ang iyang anak nga si Kevin sa dughan ug dihang nalup-og ug nawad-an sa panimuot sunod niining gibitad ang 3-anyos nga apo sa iyang asawa nga niadtong higayuna naghilak na sa kalisang.
Diha-diha gisunod kini pagdunggab sa suspek makadaghang higayun sa lain-laing bahin sa lawas. Ang duha pulos patay na pag-abot sa Ricardo Maningo District Hospital.
Ang kapulisan nga miresponde nakaabot pa sa suspek nga nagbitbit og kutsilyo ug ang pikas kamot nagbitbit usab sa paltik nga kalibre .38 rebolber ug giingong daw wala sa kaugalingon.
Ang mga polis misuway pakig-negosasyon sa suspek ug giawhag kini sa pagtahan, hasta ang kapitan sa barangay nga si kapitan Alfredo Muana mitabang sa pagkombinsir sa suspek.
Apan giingong kalit midanguyngoy og hilak ang suspek ug igo lang mitubag nga wa nay kapuslanan ang iyang kinabuhi dayung dul-it sa maong armas diha sa iyang ulo ug gikablit kini makausa ka higayun.
Ang kapulisan nakakuha og suicide note sa pitaka niini nga dunay suwat nga nagkanayun nga naguol siya tungod sa sakit niyang Tuberculosis (TB) ug gituohan niyang siya maoy nakatakod sa iyang anak ug apo hinungdan nga nakahukom nalang siya pagpatay kanila ug ingon man pagpakamatay.
Ang asawa sa suspek nga si Bernardita mibutyag sa gihimong pagsukitsukit sa kapulisan nga wala silay namatikdang dunay gipamating sakit ang suspek sa mga nanglabay’ng bulan. (EIM) (BANAT)
Linkback:
https://tubagbohol.mikeligalig.com/index.php?topic=39491.0
