Ni Darrel A. Carumba/EIM (Banat) Updated August 11, 2011 12:00 AM
CEBU, Philippines - Patay diha-diha ang 23-anyos nga ulitawo human gipusil samtang nag-inom sulod sa buwangan sa Puertobal Arena Cockpit sa barangay Tuyom siyudad sa Carcar niadtong Martes sa alas 4:30 sa hapon.
Ang biktima nga patay nang nadangat sa tambalanan mao si Rey Taganile, 23, taga Guihulngan, Negros Oriental ug kasamtangang nagpuyo sa maong lugar.
Samtang ang suspek mao si Rodel Quijano, 36, nagpuyo sa Upper Tawog barangay Valladolid sa dakbayan sa Carcar.
Matud ni PO3 Vicente Garces, desk officer sa Carcar City Police dihang nahinabi sa Banat News subay sa imbestigasyon ang biktima kauban sa magsuong Arnel ug Arjie Asagan, nag-inom.
Ang suspek nga hubog niadtong tungura giingong nasuya sa biktima ug mga kauban nga nag-inom samtang nanan-aw og tari ug kalit lang mibunot sa gisuksok nga armas ug gipusil ang biktima.
Ang biktima naigo sa tuong bahin sa dughan hinungdan sa pagkatibulaag sa mga tawo paingon sa gawas sa buwangan.
Daling gitabang ang biktima ug gidala sa Carcar City District Hospital apan gideklarar nga dead on arrival, ang suspek daling nakaipsot.
Apan nasikop ra gihapon kini sa gipahigayung hot pursuit operation sa pinuy-anan sa uyoan niini nga si Boy Bardinas, apan ang suspek kusganong mihimakak sa maong krimen bisan positibo kining gitumbok sa mga kauban sa biktima. - BANAT NEWS
Linkback:
https://tubagbohol.mikeligalig.com/index.php?topic=42845.0
