Ni KRIS C. SIALANA
PIKAS ang dalunggan sa biktima human kini gitigbas sa kainom niadtong Huwebes mga alas 10:00 sa gabii sa San Juan, Balingasag, Misamis Oriental.
Milandig sa Northern Mindanao Medical Center (NMMC) ning dakbayan ang biktima nga si Ruben Salon, 45 minyo nga lumulupyo sa nahisgutang dapit.
Sa impormasiyon gikan sa NMMC, nasayran nga nagtagay sa ilimnong makahubog ang biktima ug ang suspek nga nailang si Jonas Carion apan sa kalit lang gitigbas kini gamit ang sundang sa walay igong rason.
Nakurat na lamang kini gumikan kay wala man sila magkalalis apan nagtoo ang biktima nga gumikan sa ka lango na niini maoy hinungdan sa pagpanigbas.
Samtang nilanding usab sa susama nga tambalanan ang laing biktima nga si Cardo Calo, 60 nga taga San Miguel, Baungon Bukidnon human usab gitigbas sa kainom nga wala ikabutyag ang ngalan.
Sa saysay sa nag rescue nga mga tanod, nasayran nga nagkalalis ang duha kinsa nag-uban usab sa inom sa dihang na lango na. Giingong kalit nga gikuha sa suspek ang sanggot sa biktima ug gitigbas si Calo.
Nakaangkon og samad tinigbasan sa kamot ug likod ang biktima nga si Calo hinungdan nga dali kining gidala sa balay tambalanan.
Sa pagsulat niini nga balita ang mga biktima ang pabilin pa nga nagpaalim sa NMMC.
Gipatik sa mantalaang Superbalita Cagayan de Oro Marso 12, 2016.
Linkback:
https://tubagbohol.mikeligalig.com/index.php?topic=82026.0
