Ni Darrel A. Carumba/EIM (Banat) Updated August 03, 2011 12:00 AM
CEBU, Philippines - Nabulit sa samad pinusilan ang lawas ug ulo sa usa ka hubog nga gi-ambusan sa nagmotor nga lalaki samtang nagsusapinday sa kahubog nga naglakaw ang biktima diha sa sitio Riverside barangay Arpili lungsod sa Balamban niadtong Domingo sa alas 7:30 sa gabii.
Ang biktima giila sa kapulisan nga si Wendo Banares Tejano, 24, molupyo sa nahisgutang lugar, padayon pa sa pagtumbok ang kapolisan si kinsa ang mamumuno sa biktima.
Matud ni PO2 Cesar Climaco sa Balamban Police dihang nahinabi sa Banat News gikan nakig-inom sa mga paryente ug higala sa baybayon ang biktima ug miuna kini og pauli tungod kay daghan na og nainom.
Samtang naglakaw ang biktima kalit nga gibabagan sa usa ka motorsiklong may sakay nga wala mailhing lalaki ang agianan sa biktima dayon gidul-itan pagpusil si Tejano lima ka higayon. Ang biktima naigo sa iyang ulo, dughan, tiyan ug kamot ug pagkahagba daling mipasirit palayo ang maong lalaki.
Ang mga molupyo sa lugar ug ang mga nangabot nga polis mao nay midala sa biktima sa Balamban District Hospital apan gideklarar nga patay na.
Wala pa matino sa kapolisan ang motibo sa krimen apan nagduda silang posibleng dunay dakong kasuko sa biktima ang mamumuno. - BANAT NEWS
Linkback:
https://tubagbohol.mikeligalig.com/index.php?topic=42678.0
