Ni Darrel A. Carumba/WC (Banat) Updated March 24, 2011 12:00 AM
CEBU, Philippines - Gituohang gitulis ug pagkahuman gipatay sa wala hiilhing kriminal ang 79 anyos nga mag-uuma kansang mga ngipon nangapupo ug nabuak ang nawong nga napalgan didto sa kalibunang bahin sa barangay Tubod, Duguan, lungsod sa Dumanjug niadtong Martes sa alas 9:00 sa gabii.
Ang biktima mao si Feloteo Largo, 79, minyo, usa ka mag-uuma ug nagpuyo sa maong lugar.
Si SPO1 Florencio Carreon sa Dumanjug Police Station mibutyag sa Banat News nga ang biktima nananghid nga moadto sa tindahan ni Tonette Dalocanog nianang alas 4:00 sa hapon aron pagbayad sa iyang utang.
Apan didto giingong nakig-inum kini sa iyang mga barkada nga sila si Aristio Lopez Jr., 16, ug sa helper sa tindahan nga si Tata Calago ug mga alas 9:00 na sa gabii migikan aron mopauli sa ilang balay.
Apan samtang naglakaw ang biktima nga nag-inusara paingon sa ilang balay, gisundan kini sa kriminal ug pag-abot sa mingaw nga dapit gitulis kini ug pagkahuman gipusposan sa kahoy nga dos por dos hinungdan nga nabuak ang nawong niini ug nangalubo ang ngipon.
Gituohang gitulis ang biktima pagkahuman gipatay tungod kay nahanaw ang kwarta niini nga P800 nga diha sa iyang beltbag ug ang patay’ng lawas niini giguyod ngadto sa kasagbutan duol sa usa ka puno-an sa lubi.
Gihulagway sa kapolisan nga gawas nga nabuak ang nawong, nalubyok usab ang ulo niini ug may mga samad pa sa luyong bahin sa ulo nga maoy nakaingon sa hinanaling kamatayon niini.
Sa paghimo ning balita padayon pa ang manhunt operation sa kapolisan pagtino sa tawong mipatay sa biktima. - BANAT NEWS
Linkback:
https://tubagbohol.mikeligalig.com/index.php?topic=39397.0
