Ni Romeo Limpangog/EIM (Banat) Updated March 19, 2011 12:00 AM
CEBU, Philippines - Labing dako nga bibingka sa tibuok kalibutan maoy giambisyong lutuon sa dakbayan sa Mandaue sa sunod nga mga bulan niining tuiga nga gitumong nga masulod sa Guinness Book of World Records.
Ang pagluto sa maong bibingka gitinguhang himuon karong Marso 27 niining tuiga nga gibana-banang moabot sa 50 ngadto sa 60 ka tiil ang gihabogon ug ang gilapdon susama sa kalapad sa basketball court.
Si Luela Flores Cabanero nga maoy tourism officer sa maong dakbayan miingon nga mokabat sa 200 ka sako nga first class nga bugas ang ilang gamiton alang sa maong tinguha.
Ang Mandaue naila na sa pagluto og lamiang bibingka dinhi sa lalawigan nga maoy nag-unang delicacy sa maong dakbayan partikular na sa mga turista.
Daghang mga batid sa pagluto og bibingka nga mga Mandauehanon ang gikatakdang tawgon aron motabang sa maong ambisyon. Kini abagan sa Department of Education (DepEd) sa division office sa dakbayan pinaagi sa mga tinun-an ug magtutudlo sa publikong tulunghaan sa dakbayan.
Si Cabanero miingon nga dili lang bugas nga humay ang ilang andamon kondili lakip na usab ang mga dahon sa saging nga andamon gikan sa kabarangayan sa dakbayan. (BANATNEWS)
Linkback:
https://tubagbohol.mikeligalig.com/index.php?topic=39225.0