Ni Romeo T. Limpangog (Banat) | Updated May 18, 2015 - 12:00am
CEBU, Philippines — Duha ka managsilingan didto sa Barangay Pulpogan, Consolacion pareho’ng nangaangol human sila nagbawos-bawos sa pagtinigbasay gamit ang usa lang ka sundang diha’ng pulos na sila nakainom.
Si SPO1 Francisco Perez Jr. sa Consolacion Police Station miila sa mga protagonista nga mao sila si Rogelio Quimod, 61, ug Avelino Alvarico, 55, pulos mga minyo ug nagpuyo sa Sitio Lumbang, Barangay Pulpogan.
Sa imbestigasyon nasayran nga ang duha hapon pa nga nagsugod og inom kaniadto’ng Sabado ug mga alas 10 sa gabii nga pulos na sila hubog, nagkalalis ang magsilingan.
Mga tanod miuwang sa panag-away sa duha ug miawhag ni Alvarico nga mopauli, apan taud-taod si Alvarico mibalik nga nagbitbit na og sundang ug gitigbas ang iyang gikalalis nga si Quimod.
Si Quimod natigbasan sa iyang ulo apan nakamaneho pa gihapon sa paglihay-lihay hangtud nga nailog niya ang sundang nga gigunitan ni Alvarico.
Gibawsan ni Quimod og tigbas si Alvarico ug naigo kini sa iyang apapangig. Human madala sa ospital ug gitambalan, pareho sila nga gipriso. -/RUB (BANAT NEWS)
Linkback:
https://tubagbohol.mikeligalig.com/index.php?topic=79966.0
