Ni Brenda D. Batuto (Banat) | Updated May 19, 2015 - 12:00am
CEBU, Philippines – Lima ka kawani sa Kapitolyo ang nasakpang positibo paggamit og ilegal nga drugas atol sa gipahigayong drug test kagahapon.
Ang gipaubos sa drug test mao ang mga casual ug job orders sa buhatan sa Provincial Environment and Natural Resources Office (PENRO), ingon man ang mga bag-ong na-hire nga mga JO sa Provincial Engineering Office ug sa Information Communication Technology Office (ICTO).
Ang hepe sa Cebu Provincial Anti-Illegal Drug Abuse Council (CPADAC), Joey Herrera nagkanayon 63 unta ka kawani ang ipaubos sa drug test apan 57 lang ang mitungha, ang unom absent kini kagahapon.
Ang 42 niini gikan sa PENRO, 15 sa engineering ug unom sa ICTO.
Wala ibutyag ni Herrera kung asa nga departamento nadestino ang nahisgutang lima.
Matud pa upat kanila positibo sa paggamit og shabu ug ang usa positibo sa paggamit og marijuana.
Hinuon ipaubos pa sa confirmatory test ang resulta sa gipahigayong drug test kagahapon.
Ang CPADAC migahin sa budget niini og P300,000 matag tuig alang sa drug test sa dos mil ka mga kawani sa Kapitolyo. – /EIM) (BANAT NEWS)
Linkback:
https://tubagbohol.mikeligalig.com/index.php?topic=79968.0
