MikeLigalig.com

SuperBalita Cebu
Ni Guam P. Logroño
Saturday, July 19, 2014


HABAL-HABAL driver nga napilde sa sugal nga hantak mihunos sa kaugalingong kinabuhi pinaagi sa paghikot og pisi sa iyang liog sulod sa panimalay niini niadtong Sabado sa alas 12:30 sa udto sa Sitio Kaipilan, Barangay Poblacion, dakbayan sa Carcar.

Si Rene Lapas 31, minyo, dunay usa ka anak, nagpakamatay tungod sa iyang kauwaw nga naputos sa utang ug na-prenda ang motorsiklo ug uba niyang kabtangan.

Si SPO1 Jose Yamasaki Repompo, desk officer sa Carcar Police, nga nahinabi sa dySS Super Radyo/Sun.Star Superbalita nagkanayon nga usa ka Kenneth Alicaba, paryente ni Lapas, maoy nakadiskubre sa patayng lawas.

Matod pa niini nga si Alicaba, nagsigeg sampit kang Lapas, apan wala gyud kini motubag hinungdan nga gisusi niini sa lawak ug nakurat na lang siya kay maoy nisugat sa duha niya ka mga mata nga nagbitay na ang biktima.

Nagdali siyag pangayog pakitabang sa mga silingan ug kabanay ingon man sa mga kapulisan. Dali untang gidala si Lapas sa tambalanan sa dakbayan sa Carcar apan gideklarar kini nga dead-on-arrival (DOA).

Matod ni Repompo nga nauwaw na gyud og maayo si Lapas gumikan sa iyang kasaypanan. Walay foul play nga nakita ang kapulisan ug ilang nasuta nga aduna pa kini gibilin nga suicide note sa iyang kabanay.

Nangayo siyag pasaylo sa iyang nabuhat, ingon man nanugon kini nga ipaatiman ang iyang anak nga batang lalaki pagmaayo ug dili gyud pasagdan. Gibutang sa suicide note niini ang pangalan sa tawo, nga giprendahan sa iyang motorsiklo nga mokantidad sa P5 mil pesos, ingon man daghang mga alahas, samtang gitug-an niya nga wala niya ang selpon.

“Pwerti naman daw ani niyang pagkasugarola, nabo-ang naman daw ni siya sa sugal mao ning nagproblema na hinuon ug naghikog” dugang ni SPO1 Repompo.

Linkback: https://tubagbohol.mikeligalig.com/index.php?topic=78662.0