Ni Darrel Carumba/EIM (Banat) Updated September 09, 2011 12:00 AM
CEBU, Philippines - Nagmerida nang daan ang usa sa duha ka gwardiyang napatay sa mga tulisan niadtong Lunes sa buntag pipila ka mga adlaw sa wala pa kini mapatay sumala pa sa asawa niini.
Gibutyag ni Elma Udag, asawa sa gwardiyang si Lito Udag sa interbyu sa DyDD nga pipila ka mga semana sa wala pa ang insidente gisultihan sa iyang bana ang ilang bugtong anak babaye nga tinun-an sa high school nga magtarong gyud pag-eskuwela tungod kay peligro ang klase sa iyang trabaho.
Giingong gipasabot ni Udag sa anak nga isip usa ka gwardiya ug adunay mahitabong pagpanulis mosukol gyud siya sa mga tulisan maong mabutang gyud sa peligro iyang kinabuhi.
“Miingon man na siya (Udag) sa among anak nga maningkamot gyud pag-eskuwela, kay akong trabaho kuyaw, dili lalim among trabaho kay kun tulison kuno sila mosukol man gyud silang mga gwardiya,†dugang asoy ni Elma Udag.
Gibutyag ni Elma Udag nga nag-abot abot na ang nadawat nilang hinabang gikan sa Puritan Security Agency ilabi na sa pinansiyal ug misaad pa nga motabang og asikaso sa obligasiyon sa tambalanan.
Apil sa mibisita sa haya ni Udag ang staff nga gisugo ni Mayor Michael Rama nga mitunol og P15 mil; si Kongresista Mikey Arroyo sa Ang Galing Pinoy Partylist nga mitunol usab og P5 mil.
Gawas niini nisaad pa ang kongresista pagtabang sa pagpatungha sa bugtong anak niining babaye sa namatay dungan sa pagbilin og numero sa kongresista nga mahimo niining matawgan kung gikinahanglan.
Ang Galing Pinoy Partylist maoy representante sa mga gwardiya sa kongreso.
Si Lito Udag ug Leofer Etac sa Puritan Security Agency nga pulos nadestino sa armored van sa China Bank pulos napusilan patay dihang gitulis ang teller nga ilang gibantayan nga naghatud og kwarta sa usa ka money changer sa Foodcourt sa Robinsons Department Store niadtong Lunes sa buntag.
Hinuon napatay usab ang tulo sa mga tulisan ug laing usa naangol ug padayun pang gipangita samtang duha ka polis usab ang naangol sa pagresponde. (BANAT NEWS)
Linkback:
https://tubagbohol.mikeligalig.com/index.php?topic=43426.0
