Ni Jonathan F. Tumulak
Thursday, February 3, 2011
MGA rugby girls nga mag-estambayan sa Fuente Osmeña nakabiktima og usa ka turistang langyaw.
Maayo gani kay nakuha pa og balik ang P21,000 sa turista, apan didto na sa Brgy. Ermita, dakbayan sa Sugbo, nakuha sa kapulisan uban sa pag-abag sa mga barangay tanod.
Sa siyam ka mga batang babaye nga menor de edad nga nalambigit sa pagpanguot ug paglabni, lima kanila ang nadakpan.
Ang misumbong sa kapulisan sa Fuente giilang mao si Michael Philpott, 30, taga California, Estados Unidos.
Sa pasiuna nga imbestigasyon nga gihimo ni SPO1 Agustin Collano, naglakaw sa General Maxilom avenue ang biktima uban sa iyang higala nga babaye.
Gisugat sila og siyam ka mga batang menor de edad ug nagpasumangil ang uban nga nagpakilimos.
Nabantayan ni Philpott nga gilibotan siya sa mga bata ug adunay ningkuot sa iyang bulsa sa likod ug gikuha ang gipilo niya nga P21,000.
Sa dihang nakuha na sa mga bata ang kwarta, ila kining gipasa-pasa hangtod nga ilang giitsa ngadto sa usa ka alyas “Mago,†menor de edad nga bayut dayong sibat.
Sa gihimong follow-up operation sa kapulisan sa Fuente nga gidangpan sa biktima, nasakpan ang lima ka mga batang babaye.
Dihang giimbestigar sa kapulisan, ningtug-an sila nga ang kwarta gidala ni Mago nga taga Brgy. Ermita.
Gipatik sa mantalaang SuperBalita Cebu Pebrero 04, 2011. http://www.sunstar.com.ph/superbalita-cebu/balita/rugby-girls-mibiktima-og-turistaLinkback:
https://tubagbohol.mikeligalig.com/index.php?topic=37409.0
