Ni KRIS C. SIALANA
BUSLOT ang tiyan sa usa ka ulitawo ug bali ang tuo nga bahin sa iyang paa human gisungag sa kabaw niadtong milabay nga adlaw sa Mat-i, Claveria, Misamis Oriental.
Kritikal ang kahimtang sa biktima nga si Rielven Morga, 27, ulitawo ug lumulupyo sa nahisgutang dapit.
Gisaysay sa igsuon sa biktima nga giingong paingon unta kini sa sentro sa Claveria sakay sa motorsiklo apan wala na kini makalahos sa dihang na aksidente gumikan sa kabaw nga gitigway kilid sa maong kalsada ug kalit nga nagpatunga.
Wala na matud pa kini malikayi sa biktima ug maayo nga pagkaigo sa iyang tiyan sa sungay sa maong kabaw, hinungdan sa pagkabuslot niini gani nigawas pa ang tina-e niini.
Daling gidala ang biktima sa balay tambalanan ilabi na sa Northern Mindanao Medical Center ning siyudad sa Cagayan de Oro human nga nawad-an kini sa panimoot gumikan na usab sa maong aksidente.
Sa pagsulat niini nga balita, ang maong biktima ang pabilin pa nga giatiman sa mga mananambal sa nahisgutang ospital.
Gipatik sa mantalaang SuperBalita Cagayan de Oro Oktubre 15, 2015.
Linkback:
https://tubagbohol.mikeligalig.com/index.php?topic=81177.0
