TACURONG CITY - Usa ka bayut ang gipatay sa matud pa ka-date niini, alas 8:40 sa gabii niadtong Huwebes.
Giila ang biktima nga mao si Jayson Recafort Constantino, 16, ug molupyo sa Purok Rang-ayan, Barangay Villamor, Esperanza, Sultan Kudarat.
Gibutyag ni Sultan Kudarat Provincial Police Office director Emmanuel Peralta nga misuroy ang biktima didto sa Barangay Kakal, Esperanza uban ang barkada niini nga si Melmar Balmocena.
Sumala pa nga ang mga nahisgutan dunay ka-date nga mga ulitawo nga ilang ka-textmate niadtong tungura.
Apan milabay ang pila ka gutlo, nakit-an na lang ang patay nga lawas ni Constantino nga gisulod sa sako sa ilawom sa tulay didto sa Purok Malipayon, Barangay Kakal.
Ang biktima nakahiagum og samad pinusilan sa likod sa lawas nga milapos sa dughan.
Gisulti sa inahan sa biktima nga mismong si Balmocena nga bading sab maoy namugos nga manuroy sila ug makigkita sa ilang ka-textmate.
Nananghid si Constantino sa iyang inahan nga si Marilyn nga manuroy ug mouli lang og sayo uban ang iyang barkada.
Padayon karon nga mihimo og dugang imbestigasyon ang kapulisan sa Esperanza Municipal Police Station sa maong hitabo. (Edgar E. Fuerzas)
Gipatik sa mantalaang Superbalita Davao Enero 16, 2016.
Linkback:
https://tubagbohol.mikeligalig.com/index.php?topic=81713.0
