Ni Rey Pasaporte (Banat) Updated May 03, 2011 12:00 AM
CEBU, Philippines - Tungod sa grabeng pangabubho usa ka 28-anyos nga lalaki gipusil patay sa laing lalaki gumikan sa pagtuong giuyab-uyab sa biktima ang kapuyo sa suspetsado.
Nahitabo ang pagpamusil niadtong Domingo sa hapon pasado alas-4 diha sa sitio Mahayahay uno sa barangay Carreta siyudad sa Sugbu.
Si Ryan Santos, 28, sa dakbayan sa Lapulapu, nakaangko’g samad pinusilan sa iyang tiyan ang daling gidala sa iyang higala ngadto sa Cebu City Medical Center (CCMC) apan namatay human sa pipila ka oras nga gitabang.
Samtang ang suspetsado nga nakaikyas human sa hitabo mao si Ronnie Estañero nagpuyo sa nahisgutang lugar.
Si Jerome Cejudo, 22, silingan sa suspetsado mitug-an sa kapulisan sa grupo nila ni PO3 Victor Ruel Ayuman nga nagbarog sila sa biktima daplin sa karsada sa dihang kalit nga miduol ang suspek nga armado sa wala matinong kalibre sa armas ug gipusil ang biktima.
Human mahagba ang biktima daling gidala ni Cejudo ngadto sa CCMC apan nakabsan gyud kini sa iyang kinabuhi.
Matud ni PO3 Geoffrey Gutual sa Homicide Section nga si Cejudo mitug-an kanila nga nasuko ang suspetsado ngadto sa biktima sa pagtuong nakig-relasyon kini sa kapuyo niini.
Karun nga nailhan na sa kapulisan ang suspetsado nagpadayon sila sa pagpanguha og impormasyon sa posibleng gitagoan niini aron ila kining madakpan. - BANAT NEWS
Linkback:
https://tubagbohol.mikeligalig.com/index.php?topic=40481.0
