Ni Darrel A. Carumba/EIM (Banat) Updated August 03, 2011 12:00 AM
CEBU, Philippines - Naangol ang usa ka polis human aksidenteng nalamba ang gisakyan niining motorsiklo atol sa ginukdanay tali niini ug sa giingong masiao coordinator nga ni-eskapo atol sa gilusad nilang checkpoint sa barangay Carmelo sa lungsod sa Tuburan niadtong Domingo sa alas 8:00 sa gabii.
Ang naangol nga polis mao si PO1 Sharon Joseph Esmiro, nadestino sa Tuburan Police Station samtang gitago una ang pangalan sa gitumbok nga masiao coordinator nga nakaeskapo samtang nanghipos pa sila og dugang ebidensiya batok niini.
Matud ni Insp. Wilter Grapa, hepe sa Tuburan Police Station nga nahinabi sa Banat News aduna silay saturation drive niadtong tungura batok sa mga masiao coordinators nga naglihok sa maong lugar subay usab sa mga impormasiyon nga ilang nadawat.
Apan dihang gitimbrihan sila sa ilang asset nga nagpaingon na sa ilang dapit ang subject sakay sa itom nga Yamaha nga motorsiklo nakamatikod kini dayon pag-abot sa usa ka eskina daling mitipas sa pikas dalan.
Tungod niini daling migukod si Esmiro, gikatahong na-corner sa usa ka paril ang suspek apan nakatipas nasad og laing agianan hangtud nga nabangga sa usa ka punoan sa lubi.
Si Esmiro sa pagdali-dali nakurat sa mao gihapong pader ug napugos sa pagtamak sa brake hinungdan sa pagkabalintong niini ug naangol. Si Esmiro gidala sa tambalanan.
Ang suspek daling miikyas ug gibiyaan ang iyang motorsiklo ug diha sa U-Box niini napalgan ang mga tally sheets ug kombinasyon sa numero sa masiao ingon man kwarta nga P200 nga gituohang koleksiyon niini sa maong sugal. - BANAT NEWS
Linkback:
https://tubagbohol.mikeligalig.com/index.php?topic=42680.0
