Ni Brenda D. Batuto/EIM (Banat) Updated June 29, 2011 12:00 AM
CEBU, Philippines - Wala na makaabot nga buhi sa Lapu-Lapu City District Hospital ang usa ka 33-anyos nga construction worker kinsa giingong gibunal-bunalan sa iyang kaubang construction worker nga iyahang kainom kagahapon mga pasado alas 4:00 sa hapon diha sa dalan Sangi, barangay Pajo sa nahisgutang siyudad.
Ang biktima mao si Samuel Mina, taga barangay Basak sa maong siyudad nakaangkon og mga bun-og sa lawas ug nawong ug ang li-og niini nabali ug nahiwi.
Ang suspetsado kinsa daling misibat human sa hitabo ug padayon pang gipangita sa mga polis giila lang sa ngalan nga “Marmar†taga sitio Kawayanan, barangay Gun-ob sa nahisgutan usab nga siyudad.
Ang kauban nilang si Joseph Orpio, 27-anyos taga barangay Marigondon gipaubos usab karon sa imbestigasyon sa kapolisan.
Si SPO3 Jesus Gimenea ug PO2 Carlos Barluado sa Lapu-Lapu City Police Station daling miresponde sa nahisgutang insidente. Si Gimenea nga nahinabi sa Banat News kagahapon nagkanayon nga sa wala pa mahitabo ang insidente nag-inom ang tulo, si Orpio nagkanayon nga gisugo siya sa duha sa pagpalit og sumsuman apan sa iyang pagbalik gibunal-bunalan na sa suspetsado og uno-por-dos nga kahoy ang biktima.
Si Gimenea midugang nga ang duha nagkalalis ug misangpot sa pagbunal-bunal sa suspetsado ngadto sa biktima apan wala nila mapiho ang hinungdan sa gilalisan sa duha. (BANAT NEWS)
Linkback: https://tubagbohol.mikeligalig.com/index.php?topic=41975.0
