Ni KRIS C. SIALANA
PADAYONG nakigbugno sa kamatayon ang usa ka ulitawo human kini gipusil sa wala mailang suspetsado kagahapon mga alas 2:15 sa kaadlawon samtang nangaligo diha sa LTO crossing sa Bulua ning siyudad sa Cagayan de Oro.
Kritikal ang biktima nga nailang si Alvin Obsomia, 23, ulitawo, lumolupyo sa Iponan ning siyudad.
Nilanding ang ulitawo sa Northern Mindanao Medical Center (NMMC) ning siyudad human nakaangkon og samad pinusilan sa iyang likod, hinungdan nga talandugon ang kahimtang niini.
Gikabutyag nga samtang nangaligo ang biktima kauban ang mga barkada niini, giingong nalingaw kini nga nag-estoryahanay ug grabe ang pagpangatawa.
Gidugang pa nga namatikdang nasuko ang laing grupo nga anaa niadtong tungora ug nanglakaw apan wala kini magdahom sa dihang nibalik ang usa niini ug kalit nga gipusil ang nahisgutang biktima sa wala matuki kung unsa nga klase sa armas ang gigamit.
Sa pagsulat niini nga balita, pabilin pa nga anaa sa talandugon nga kahimtang ang ulitawo samtang gawasnon pa ang suspetsado, kinsa daling misibat human sa maong insidente.
Gipatik sa mantalaang Superbalita Cagayan de Oro Enero 12, 2016.
Linkback:
https://tubagbohol.mikeligalig.com/index.php?topic=81687.0
