Ni Darrel Carumba (Banat) Updated November 26, 2011 12:00 AM
CEBU, Philippines - Gimanduan sa Ombudsman Visayas ang usa ka magtutudlo nga gireklamong nangumot sa baba ug mihagbong sa tinun-ang 10-anyos pagtubag sa reklamo sa mga ginikanan batok kaniya.
Ang maestra nga si Elma Dosdos sa Managase Elementary School sa lungsod sa Borbon gireklamo sa mga ginikanan sa maong bata diha sa buhatan sa Ombudsman kalabot sa hitabo niadtong bulan sa Pebrero ning tuiga apan Septiyembre na nila napasaka ang reklamo.
Ang magtiayong Ricardo ug Amelita Casas mipasangil nga gikumot sa maong maestra ang baba sa ilang anak dihang kini mitug-an kanila nga wala sila magklase kay ‘nagtabi’ ra ang ilang maestra.
Matud pa sa pasangil tungod sa kasuko sa maong magtutudlo gikumot niini ang baba sa bata ug giingong mibahad nga bisan og magkinaunsa dili gyud kini niya papasaron aron makasaka sa grade 5.
Sumala pa nga naagian sa amahan ang anak uban sa mga classmates diha sa gawas atol sa oras sa tingklase niadtong Pebrero maong gipangutana kini nganong wala sila sa ilang lawak, ang bata giingong mitug-an nga wala sila magklase kay nagtabi ra ilang maestra.
Apan adunay classmate sa bata nga nakasumbong kabahin sa gitug-an sa biktima ngadto sa amahan niini hinungdan sa kasuko sa maong magtutudlo ug giingong gikumot ang baba niini.
Ang bata misumbong sa iyang ginikanan kinsa mikomprontase ni Dosdos, apan imbes mangayo’g pasaylo gibaharan hinuong dili papasaron ang bata sa Marso. Niadtong Marso nahagbong gyud ang 10-anyos sa iyang klase.
Nunot niini mireklamo ang mga ginikanan tungod kay ‘honor student’ ang ilang anak sukad pa sa grade one maong di sila makatuong ingon lang niana kadali mahagbong na kini.
Si Assistant Ombudsman for the Visayas Virginia Palanca Santiago human matun-i ang reklamo mihatag og napulo ka adlaw kang Dosdos sa pagsang-at sa iyang tubag samtang giandam na nila ang imbestigasyon. (BANAT NEWS)
Linkback:
https://tubagbohol.mikeligalig.com/index.php?topic=44415.0
