Ni JEEPY P. COMPIO
DAVAO CITY - Dead on arrival sa Davao Doctor's Hospital ang usa ka lalaki kinsa gipusil-patay sa giingong iyang kasusyo sa negusyo tungod sa siopao alas 9:30 sa gabii, Huwebes didto sa #91 Canada Street, Executive Homes, Barangay Matina Aplaya.
Ang biktima giila nga si Roel Nicolas Marañon, 43, nagpuyo sa Barangay Panacan; samtang ang suspek mao si Evans Nicolas Tumalip, 45, minyo, residente sa Diamond Street, Liwayway Village.
Sa inisyal nga imbestigasyon ni Senior Police Officer 1 Arnel Iriarte nasayran nga subay sa giingon sa saksi nga si Bernard Ansugan Calixto, 21, panadero, iyang nadungog nga naglalis ang duha labot sa ilang negusyo nga siopao.
Giingon nga dihang mitaas ang tensyon sa panaglalis, kalit mibunlot sa iyang pusil ang suspek ug gipusil sa duha ka higayon ang biktima ug human sa hitabo daling misibat ang suspek padung sa wa matino nga direksyon.
Ang biktima daling gidala sa iyang kapuyo nga si Judith Almosera Dumali sa hospital apan gideklara kini sa mga doktor nga dead on arrival.
Dugang ni Dumali nga daan nang naglalis-lalis ang biktima ug suspek sa ilang negusyo nga siopao.
Ang kapulisan padayong naghimo og imbestigasyon labot sa krimen.
Gipatik sa mantalaang SuperBalita Davao Agosto 29, 2015.
Linkback:
https://tubagbohol.mikeligalig.com/index.php?topic=80845.0
