GITANDI ngadto sa bagyong Ruping nga labing kusog nga miigo sa Sugbo niadtong 1990 ang bagyong Pablo nga gipaabot nga moigo sa Sugbo.
Ang bagyong Ruping mihimo og lapad kaayong kadaut sa mga imprastraktura ug mga kabtangan niadtong Nobiyembre 1990 dunay gikusgong 225 kilometros matag takna dihang niagi kini sa dakbayan sa Sugbo.
Usa sa mga nangadaut niadto mao ang unang taytayan sa Mactan human maigo sa dakong barko nga gihapak sa dagkong mga bawod.
Sa weather bulletin sa Philippine Atmospheric Geophysical and Astronomical Service Administration (Pagasa) alas 5 kagahapon sa hapon, ang Southern Cebu, Southern Leyte, Bohol, Negros Oriental, Siquijor, Misamis Occidental, Lanao del Norte, Lanao del Sur, North Cotabato ug Zamboanga del Norte ang gipaubos sa storm signal no. 2.
Samtang signal no. 1 sa ubang bahin sa Sugbo apil na ang mga isla sa Camotes, Eastern ug Western Samar, Leyte, Biliran, Aklan, Capiz, Antique, Iloilo, Guimaras, Negros Occidental, Zamboanga del Sur, Maguindanao, Sultan Kudarat, Sarangani ug South Cotabato.
Samtang signal no. 3 sa ubang mga lugar sa Mindanao.
Si Pablo katapusang nakit-an 390 kilometros habagatang-silangan sa Hinatuan, Surigao del Sur ug gipaabot nga motugpa sa yuta karong buntag sa maong lugar.
Nangandam
Matod ni Engr. Al Quiblat sa Pagasa Mactan nga nausab ang lihok sa bagyo ug nagpaingon na kini sa direksiyon westerly gikan sa kasadpan-amihanang-kasadpan.
Apan nagdala gihapon kini sa hangin nga may gikusgon nga 175 kilometros matag takna haduol sa iyang sentro ug pag-unos nga moabot ngadto sa 210 kilometros matag takna.
Ang bagyong Pablo gihulagway nga susama kabangis sa bagyong Ruping ang gikusgon nga niigo sa Sugbo niadtong Nobiyembre 13, 1990.
Ang bagyong Pablo giisip nga maoy labing kusog nga nisud sa nasod karong tuiga. Nagdala kini og 15-30 millimetros nga volume sa uwan matag oras.
Tungod niini, ang kagamhanan sa lalawigan sa Sugbo nangandam na sa pag-abot sa super typhoon aron malikayan ang kinabuhi nga makalas ug dagkong kadaut nga mamugna niini.
Si Gobernador Gwen Garcia daling nagpatawag og emergency meeting sa tanang mga sakop sa Provincial Disaster Risk Reduction and Management Council (PDRRMC) kagahapon sa buntag sa Kapitolyo.
Sa maong tigom, ang gobernador nialerto sa tanang mga ahensiya sa kagamhanan sa lalawigan ug sa mga mayor sa kalungsuran nga pangandaman ang pag-igo sa bagyo sa Sugbo.
Iyang gitahasan ang mga contractor sa lalawigan nga iandam ang ilang mga ekipo alang sa clearing operation.
Iya usab gitahasan ang mga mayor nga mopatuman og food for work program alang sa mga mananagat sud sa tulo ka adlaw aron dili una sila managat samtang naghulga pa ang bagyong Pablo sa Sugbo ug aron duna usab sila’y ikasuporta sa ilang mga pamilya.
Si Garcia nihangyo sa mga Sugbuanon nga mag-ampo aron malikay sa dakong kadaut ang Sugbo gikan sa pagkusokuso sa bagyong Pablo.
“I ended this meeting with a plea to all of the members and this is also a plea to all Cebuanos to pray for protection to our Señor Sto. Niño, to our Lady of Guadalupe and of course San Pedro Calungsod, that Cebu may be speared from the rummaging effect of what they call a super typhoon.†matod sa gobernador dihang nahinabi sa mga tigbalita sa Kapitolyo human sa tigom.
Gialerto
Si Cebu City Mayor Michael Rama nakigtagbo usab kagahapon sa tanang department heads aron mohimo sila og contingency plans.
Iya usab nga gipang-alerto ang barangay disaster brigades.
Gitahasan usab niya si Dr. Stella Ygoa sa City Health Dept. sa pag-andam sa tanang health centers sa mga barangay.
Gipaandam usab niya ang tanang mga heavy equipment sa Department of Engineering and Public Works (DEPW).
Alang sa mga emerhensya, mahimong motawag sa 166 alang sa pulis; 160 sa fire ug 161 alang sa Emergency Rescue Unit Foundation (Eruf).
Sa dakbayan sa Talisay, si Konsehal Celiapo Cabuenas nipahibawo nga ila usab nga gitigom ang City Disaster Risk Reduction and Management Council.
Mga lumolupyo sa dakbayan nga nag-ungaw sa kakuyaw sa landslide giawhag sa pagbiya sa ilang mga dapit.
Mga barangay hall ug covered courts magsilbe usab nga evacuation centers.
Linkback: https://tubagbohol.mikeligalig.com/index.php?topic=60247.0
