Sunday, September 2, 2012
USA ka lalaki ang nakaplagan nga wala nay kinabuhi, nabuak ang ulo niini ug migawas ang utok human gituohang gipareglahan sa wala mailhing mga suspetsado niadtong Sabado sa gabii diha sa Macasandig ning siyudad sa Cagayan de Oro.
Ang biktima giila nga mao si Edgar Ginahan, hingkod ang edad, minyo, taga Canitoan ning siyudad.
Ang asawa sa biktima nagsaysay nga nagtrabaho ang bikitima isip panday ug mason sa Xavier Heights ug nanaghid niadtong tungora kaniya nga moadto sa Ramonal Camaman-an kay kobrahon ang sweldo.
Saysay sa asawa sa biktima nga lisod gyud kaayo sila ug kung magsweldo iyang bana daw sige og unya-unyaon sa engineer kay pakyawan man ang trabaho niini hinungdan maoy sige og balik-balikan niini sa dapit.
Nasakit ang asawa tungod kay wala kini makauli adlawng Biyernes ug Sabado sa buntag iyang nadawat ang taho nga patay na ang iyang bana.
Sa inisyal nga imbestigasyon sa kapolisan nasuta nga gibundakan og bato ang ulo sa biktima ug gitabangan og sukmag tungod sa mga bun-og nga nakita sa lain-laing parte sa lawas niini.
Gibiyaan lamang ang biktima sa dapit nga nahimutangan ug nakuha sa kapolisan sa Police Station 9 (PS9) sa Macasandig ang pangalan niini pinaagi sa cedula nga anaa sa bulsa sa biktima.
Blangko pa ang kapolisan kinsay suspek pagpatay sa biktima ug giimbestigahan pa sa kapolisan ning panahona.
Ang asawa sa biktima nanawagan nga unta maayudahan sila ug adunay motabang kanila aron maplastar ang lubong niini labina lisod sila kaayo ug napay tulo ka mga anak nga mismo ang biktima lang ang gisaligan. (SVB)
Gipatik sa mantalaang SuperBalita Cagayan de Oro Septembre 03, 2012.
Linkback:
https://tubagbohol.mikeligalig.com/index.php?topic=54419.0
