Ni JEEPY P. COMPIO
NAGPATALA sa buhatan sa kapolisan ang tulo ka mga babaye nga trabahante sa usa ka balay kalingawan human sila nagdumog kay giingnan sila sa kustomer nga guwapa ug taas siya’g ilong itandi kanila.
Ang insidente nahitabo alas 3 sa kaadlawon niadtong Sabado, Oktubre 1, didto sa usa ka balay kalingawan sa Bonifacio Street, Barangay 4-A Poblacion, dakbayan sa Davao.
Base sa blotter nga natala ni Police Officer 2 Ronald Muaña, duty desk officer sa San Pedro Police Station, nasayran nga samtang nanirado na ang bar gumikan sa liquor ban sa dakbayan, kalit misulod ang usa ka Princess (bansagon gitago sa Superbalita), kay gusto pa niini magtagay, tungod giingong regular kustomer siya.
Gibalibaran siya sa tulo ka babaye nga sila, Herna, Wenny, ug Juliet (mga apilyedo gitago), kinsa giingong usa kanila online teacher samtang ang duha negosyante nga higala sa tag-iya sa bar.
Giingong gisultihan si Princess sa tulo nga di na sila mo-serve og ilimnon apan nasuko na hinuon si Princess ug namulong sa tulo nga, “Mas guwapa ko! Mas taas ko’g ilong sa imoha,†sulti sa suspek nga nagtudlo sa usa sa tulo ka mga babaye.
Napungot ang tulo human sila na-insulto hinungdan nga nagdinumogay sila kon diin ang hitabo nasaksihan sa lain pang tulo ka mga babaye nga kustomer nga wala pa kagawas sa maong bar.
Gihandos na lang ngadto sa barangay level ang maong kaso aron didto sila husayon.
Gipatik sa mantalaang Superbalita Davao Oktubre 03, 2016.
Linkback:
https://tubagbohol.mikeligalig.com/index.php?topic=82862.0