Ni Darrel Carumba (Banat) Updated August 29, 2012 12:00 AM
CEBU, Philippines - Asawa nga nakig-esmiringhoy sa iyang kabit sud sa ilang pinuy-anan nasakpan sa bana tungod usab sa pagsumbong sa ilang mga anak hinungdan nga kini natigbasan sa ulo niadtong Domingo sa hapon sa usa sa mga baranggay sa Tabuelan.
Ang 26-anyos nga ginang nalandig sa tambalanan human tigbasa sa 46-anyos nga bana nga usa ka mag-uuma. Ang gitumbok nga kabit giingong silingan ra usab sa magtiayon kansang pangalan gipugngan sa Banat News aron protihian ang mga anak sa magtiayon.
Matud ni PO2 Gilbert Gallego sa Tabuelan Police Station dihang nahinabi sa Banat News didto sa umahan ang bana nianang tungora ug nabilin sa ilang balay ang asawa ug duha nila ka anak nga babaye ug lalaki nga nagpangidaron og 9-anyos ug 8-anyos.
Sumala pa nga nahibulong ang mga anak sa magtiayon nga misulod ang ilang silingang lalaki sa ilang balay ug nag-romansahay sa ilang inahan hinungdan nga nanggawas ang mga bata ug miapas sa ilang amahan didto sa ilang baol ug gisumbong ang ilang nasaksihan. Sa kasuko sa bana nagdali kining mipauli nga nagbitbit sa sundang ug pagsaka niya sa balay iyaha gyung naabtan ang asawa ug ang kulukadidang niini nga nagkarinyohay sulod sa ilang kwarto.
Dihadiha nahapsan sa bana sa sundang ang ulo sa asawa samtang daw may pagkaidlas sa isdang kasili nga nakalayat dayon sa bintana ang kabit ug mikaratil og dagan.
Bisan og samaron na sa ulo ang ginang wala kini lung-i og kulata sa bana hangtud nga nangabot ang mga ginikanan sa babaye ug gidala sa tambalanan. Ang ginang naputos og mga bun-og sa kalawasan gawas pa sa samad tinigbasan sa ulo.
Ang bana malinawong mitahan sa iyang kaugalingon sa mga polis nga miresponde. Sumala pa nga dugay nang nakadungog og tabitabi ang bana sa binuhatan sa duha ilabi na kung may gilakaw ang naulahi. Ang suspek nagplano nga mopasaka og kaso sa iyang asawa ug kabit.
Susamang hitabo usab ang nahitabo sa siyudad sa Naga dihang nasakpan sa usa ka bana ang iyang kapikas nga may kadulog nga laing lalaki diha sa ilang kwarto ug ang duha iyahang natigbasan apan nakaipsot ang lalaki, nasayran nga hasta asawa niini miikyas usab sa tambalanan dihang giadto sa mga polis. ( /EIM) - BANAT NEWS
Linkback:
https://tubagbohol.mikeligalig.com/index.php?topic=54290.0
