Ni Rey B. Pasaporte/EIM (Banat) Updated June 15, 2011 12:00 AM
CEBU, Philippines - Usa ka babaye nga giingong tigamitan og ginadiling drugas ang gipusil patay sa duha ka wala mailhing tawo nga nagsakay og motorsiklo kagahapon sa alas-3 sa kaadlawon diha sa dalan Jakosalem, sa barangay Kamagayan siyudad sa Sugbu.
Ang biktima giila sa kapulisan mao si Milagros Gingabay Español, 48, minyo, walay trabaho ug taga Don Pedro Cui sa barangay San Antonio ning siyudad.
Sa pasiunang imbestigasyon ni SPO4 Alex Dacua ug mga kaubanan sa Homicide Section sa Cebu City Police Office (CCPO) nagbutyag nga nagbarug-barog ang biktima daplin sa karsada dihang miabot ang duha ka lalaking luwan og motorsiklo ug ang backrider mipusil sa ulo sa biktima.
Daling gidala ang biktima sa mga residente ngadto sa Cebu City Medical Center (CCMC) apan paglabay sa pipila ka oras nakabsan gyud sa iyang kinabuhi sulod sa emergency room.
Samtang ang mga gikatahapan daling mipahilayo paingon sa dalan Colon ug wala na madakpi sa miresponding sakop sa Mobile Patrol Car 015 pinangulohan ni PO2 Meonik Cabañero.
Usa ka ginamit nga ampule sa nubain ug usa ka syringe nga duna pay sulod nga nubain ang nakuha sa mga doktor nga gipasok sa bra sa biktima.
Ang anak giingong mikumpirmar sa kapulisan nga taud-taod na tigamitan og nubain ang biktima.
Usa sa gisubay nga anggulo sa kapulisan mao ang drogas ug ang gikatahong ‘pagpamugaw’ sa biktima diha sa maong lugar.
Mao na kini ang ikaduhang pagpamusil sa maong lugar sa nakalabay’ng tulo ka adlaw nga ang mga biktima nagdala og ilegal nga drugas. (BANAT NEWS)
Linkback:
https://tubagbohol.mikeligalig.com/index.php?topic=41637.0
