USA ka 38 anyos nga lalaki wala na matabang ang kinabuhi human giluba ang liog sa gikalalis didto sa siyudad sa Digos.
Si Comilo Sarad, minyo, fire extinguisher technician ug lumolupyo sa Chapter 7, Barangay Aplaya sa dakbayan sa Digos, patay na sa dihang nahidangat sa Davao del Sur Provincial Hospital (DDSPH) niadtong Lunes sa hapon.
Samtang ang suspek nga nailhan nga si alyas Al, 20, way trabaho ug way saktong pinuy-anan, wa na igkita human nahimo ang krimen.
Gikanayon ni SPO4 Esdraz delos Santos nga banda alas 5:40 sa hapon niadtong Lunes, nag-inom si Sarad ug si Al sa tindahan nga gipanag-iyahan ni Nora Alisoso sa nahisgutang dapit.
Apan gituohan nga nalango sa ilimnong makahubog ang duha ug didto nagsugod ang ilang panaglalis nga nisangko sa maduguong hitabo.
Gipangita na sa mga otoridad ang suspek dungan sa pagduso og asunto batok kaniya. (Dondon Dinoy)
Gipatik sa mantalaang SuperBalita Davao Marso 02, 2011.
Linkback:
https://tubagbohol.mikeligalig.com/index.php?topic=38418.0
