Ni Romeo T. Limpangog (Banat) | Updated May 11, 2015 - 12:00am
CEBU, Philippines – Patay ang usa ka lalaki nga gituohang gidakdakan og dakong bato ang ulo samtang kini natulog sulod sa lawak sa iyang panimalay sa Purok Orchids, Barangay Fuente, Lungsod sa Carmen niadtong Sabado sa gabii.
Si Police Officer 1 Cristito Aresco sa Carmen Police Station kinsa paryente sa gipatay miila sa biktima nga mao si Geronimo Aresco, 66, nagpuyo sa maong dapit.
Matud pa ni Aresco nag-inusara niadtong tungora ang mga sakop sa pamilya sa biktima ug nahinanok na kini sa pagkatulog sa iyang lawak dihang gisaka sa wa mailhing mamumuno.
Nakugang nalang ang mga kabanay niini sa ilang pag-abot alas-6 sa gabii dihang ilang naabtan si Aresco nga nagbuy-od na sa sawog ug nagkadugo ang ulo.
Daling nangayo’g panabang sa barangay kapitan ang pamilyang Aresco apan patay na g’yud kini. Way silingang nakahatag og impormasyon bahin sa hitabo.
Usa ka dakong bato ang ilang narekober diha sa crime scene ug maoy gituohang gigamit pagdakdak sa ulo sa biktima. – /EIM) (BANAT NEWS)
Linkback:
https://tubagbohol.mikeligalig.com/index.php?topic=79942.0